სახელმწიფო აუდიტის სამსახური

საქართველოს რელიეფი, ჰიდროგრაფიული ქსელი, მეტეოროლოგიური პირობები და გარემოზე მაღალი ანთროპოგენური ზეწოლა ქმნის პირობებს ისეთი ჰიდრომეტეოროლოგიური და გეოლოგიური ბუნებრივი კატასტროფების განვითარებისთვის, როგორებიცაა: ზვავი, მეწყერი, მდინარის მიერ ნაპირების გარეცხვა, წყალდიდობა, გვალვა, სეტყვა, ეროზია, ძლიერი ქარი, ბუნებრივი ხანძრები და სხვ.
ბუნებრივი კატასტროფებით გამოწვეული ზიანის შემცირების უზრუნველსაყოფად მნიშვნელოვანია ადრეული გაფრთხილებების გამართული სისტემის (EWS) არსებობა და ამ მიზნით ჰიდროლოგიური, მეტეოროლოგიური და გეოლოგიური მონაცემების ეფექტიანი გამოყენება. გამართული ადრეული გაფრთხილების სისტემა სხვა საკითხებთან ერთად უზრუნველყოფს ადრეული გაფრთხილების სისტემის სუბიექტების როლების და პასუხისმგებლობის მკაფიო განაწილებას, მათ მიერ ჰიდრომეტეოროლოგიური და გეოლოგიური მონაცემების სათანადო გამოყენებას და ამ მონაცემებზე დაფუძნებული ადრეული გაფრთხილებების დაინტერესებული მხარეებისთვის მიწოდებას, ასევე, სამთავრობო უწყებებს, დარგის ექსპერტებს და ადგილობრივ მოსახლეობას შორის ჰიდრომეტეოროლოგიურ და გეოლოგიურ მონაცემებზე კომუნიკაციის გამართული პროცესების არსებობას, ეფექტიანი ადრეული გაფრთხილების უზრუნველსაყოფად. 
აუდიტის ანგარიშში გაანალიზებულია რამდენად არსებობს შესაბამისი წინაპირობები ჰიდრომეტეოროლოგიური და გეოლოგიური მონაცემების ადრეული გაფრთხილებებისთვის გამოყენების უზრუნველსაყოფად.