სახელმწიფო აუდიტის სამსახური

ხელვაჩაურის მუნიციპალიტეტის მერიას

რეკომენდაცია N1:

ფინანსური რესურსების რაციონალური მართვის უზრუნველყოფის მიზნით, მუნიციპალიტეტის მერიამ ბიუჯეტით გათვალისწინებული ასიგნებები გამოიყენოს შესაბამისი წლის ბიუჯეტით დაგეგმილი პროგრამების/ქვეპროგრამების მიზნებისა და მოსალოდნელი შედეგების მისაღწევად. ამასთანავე, ბიუჯეტი დაგეგმოს იმგვარად, რომ არ დაუშვას ნაშთის უკონტროლო დაგროვება და არსებული ნაშთი მიმართოს დაგეგმილი ინფრასტრუქტურული პროექტების განსახორციელებლად. 

რეკომენდაცია N2:

მერიამ შეიმუშაოს და დანერგოს დამატებითი კონტროლის მექანიზმები, რომლებიც უზრუნველყოფს სამშენებლო სამუშაოების მიმდინარეობაზე ეფექტიან ზედამხედველობას, კვალიფიციური ქვეკონტრაქტორის შერჩევას, ხარვეზების დროულად გამოვლენას და შესაბამის რეაგირებას. ამასთანავე, დაადგინოს მიმწოდებლის მიერ შეუსრულებელი სახელშეკრულებო ვალდებულების პირობებში სამუშაოს ჩაბარების გამომწვევი მიზეზები და გაატაროს სამართლებრივი ღონისძიებები. 

რეკომენდაცია N3:

მერიამ შეიმუშაოს ისეთი შიდა კონტროლის მექანიზმები, რომლებიც უზრუნველყოფს კონკურენტუნარიან სახელმწიფო შესყიდვებს და საბიუჯეტო სახსრების რაციონალურ ხარჯვას. ამასთანავე, განიხილოს ფაქტი, რომ გარე განათების ქსელის განვითარების და მოვლა-პატრონობის ქვეპროგრამის ფარგლებში აუდიტის სამსახურის მიერ გაცემული რეკომენდაციები არ არის გათვალისწინებული და გაატაროს შესაბამისი ღონისძიებები. 

რეკომენდაცია N4:

მერიამ დანერგოს ისეთი კონტროლის სისტემა, რომელიც დროულად გამოავლენს ხარვეზით შესრულებულ სამუშაოებს, განახორციელებს სათანადო რეაგირებას და უზრუნველყოფს შესრულებაში ნაჩვენები სამუშაოების ხელშეკრულების პირობებთან შესაბამისობის დადგენას. ამასთანავე, მუნიციპალიტეტმა იმსჯელოს წყალსადენის სათავე ნაგებობების მომსახურებისათვის გაწეული ხარჯების მიზანშეწონილობის შესახებ, დაადგინოს ფაქტობრივად გაწეული მომსახურების დადასტურების გარეშე და წყლის სისტემის გაუმართაობის პირობებში საბიუჯეტო სახსრების ხარჯვის გამომწვევი მიზეზები და გაატაროს კანონმდებლობით გათვალისწინებული ღონისძიებები. 

რეკომენდაცია N5:

მერიამ დანერგოს ისეთი კონტროლის მექანიზმები, რომლებიც უზრუნველყოფს საპროექტო-სახარჯთაღრიცხვო დოკუმენტაციის შესყიდვის მიზანშეწონილობას და ხელშეკრულების შესრულებაზე სათანადო მონიტორინგს. აღნიშნული ხელს შეუწყობს სამუშაოების უკეთ წარმოებას და მინიმუმამდე შეამცირებს ხარვეზებით შედგენილი პროექტების მიღებას. ამასთანავე, მუნიციპალიტეტის ხელმძღვანელობამ გამოიკვლიოს შესყიდვაში არსებული ხარვეზების გამომწვევი მიზეზები და გაატაროს სათანადო ღონისძიებები. 

რეკომენდაცია N6:

მერიამ დანერგოს ისეთი კონტროლის მექანიზმები და შექმნას ადამიანური რესურსების მართვის ისეთი პოლიტიკა, რომელიც უზრუნველყოფს სამუშაო დროის აღრიცხვის სისტემის გამოყენებას. ამასთანავე, შეფასდეს საბიუჯეტო სახსრების ხარჯვის კონტროლის მექანიზმების სისუსტეები, შეთავსებით დასაქმებული პირების მიერ სამუშაო დროის სრულფასოვნად გამოყენების და საბიუჯეტო სახსრების არარაციონალურად ხარჯვის რისკები და გატარდეს სათანადო ღონისძიებები.

რეკომენდაცია N7:

მერიამ იმსჯელოს საჯარო მოსამსახურეების პირად საკუთრებაში არსებული  ავტოსატრანსპორტო საშუალებების გამოყენების და მასთან დაკავშირებით საწვავის ხარჯვის მიზანშეწონილობაზე. ამასთანავე, შეიმუშაოს საწვავის განაწილებისა და ხარჯვის ისეთი წესი, რომელიც დაეფუძნება მოქმედ რეგულაციებს და უზრუნველყოფს საწვავის არასამსახურებრივი მიზნებისათვის შესაძლო გამოყენების თავიდან აცილებას. 

რეკომენდაცია N8:

მუნიციპალიტეტის საკუთრებაში არსებული აქტივების ფაქტობრივი რაოდენობის და მდგომარეობის დასაცავად შემუშავდეს დამატებითი კონტროლის მექანიზმები. ამასთანავე, მერიამ უზრუნველყოს კანონმდებლობით დადგენილ ვადაში მხარჯავ დაწესებულებებში სავალდებულო ინვენტარიზაციის ჩატარება და სრულყოფილად განხორციელდეს აქტივების აღრიცხვა. 

რეკომენდაცია N9:

მუნიციპალიტეტმა საბავშვო ბაღების გაერთიანებასთან ერთად დანერგოს ისეთი კონტროლის მექანიზმები, რაც უზრუნველყოფს კვების პროდუქტების შეძენაში არსებული ხარვეზების გამოვლენას და სათანადო რეაგირებას; ამასთანავე, მუნიციპალიტეტმა გამოიკვლიოს ხარისხისა და გადახდილ ფასთან შესაბამისობის დამადასტურებელი დოკუმენტის გარეშე კვების პროდუქტების შეძენის გამომწვევი მიზეზები და გაატაროს შესაბამისი ღონისძიებები. 

რეკომენდაცია N10:

მნიშვნელოვანია, რომ საკრებულოს წევრების უფლებამოსილების განხორციელებასთან დაკავშირებული ხარჯების ანაზღაურების წესი და პრაქტიკა  სრულად შეესაბამებოდეს მოქმედი კანონმდებლობის მოთხოვნებს. შესაბამისად, ხარჯების ანაზღაურება განხორციელდეს სათანადო დოკუმენტების წარმოდგენის პირობებში. 

რეკომენდაცია N11:

მუნიციპალიტეტმა შეიმუშაოს და დანერგოს იმგვარი შიდა კონტროლის მექანიზმები, რომლებიც უზრუნველყოფს ორგანიზაციის შიდა კონტროლის სისტემის შესწავლასა და შეფასებას, ასევე პროცესებში არსებული რისკებისა და სისტემური ხარვეზების გამოვლენას. მიღებული შედეგების საფუძველზე, შესაბამისმა სამსახურმა შეიმუშაოს რეკომენდაციები და განახორციელოს მისი მუდმივი მონიტორინგი.