სახელმწიფო აუდიტის სამსახური

ქუთაისის მუნიციპალიტეტის მერიამ:

• ფინანსური რესურსების რაციონალური მართვის უზრუნველყოფის მიზნით, ბიუჯეტით გათვალისწინებული ასიგნებები გამოიყენოს შესაბამისი წლის ბიუჯეტით დაგეგმილი პროგრამების/ქვეპროგრამების მიზნებისა და მოსალოდნელი შედეგების მისაღწევად; ამასთანავე, ბიუჯეტი დაგეგმოს იმგვარად, რომ არ დაუშვას ნაშთის უკონტროლო დაგროვება და არსებული ნაშთი მიმართოს ბიუჯეტით დაგეგმილი პროექტების განსახორციელებლად;
• არ დაუშვას დასაქმებულების დამატებითი ანაზღაურება ან ფინანსური წახალისება სხვადასხვა სოციალური საჭიროების მოტივით. ამასთანავე, შექმნას დამატებითი კონტროლის სისტემა, რომელიც უზრუნველყოფს სოციალური დახმარებების მიმღებ პირთა საჭიროებების შესწავლასა და დახმარების გაცემას, შესაბამისი დოკუმენტური დასაბუთების საფუძველზე. აღნიშნული ხელს შეუწყობს მოქალაქეების თანაბარ პირობებში ჩაყენებას, ასევე, ბიუჯეტით განსაზღვრული პროგრამებისა და ფინანსური რესურსების მართვის გაუმჯობესებას;
• მუნიციპალური ტრანსპორტის მართვის სისტემის გაუმჯობესებისა და მოსახლეობისთვის მაღალი ხარისხის მომსახურების მიწოდების მიზნით, გამოიყენოს მიმწოდებელთან გაფორმებული ხელშეკრულებით მინიჭებული უფლებამოსილებები, ასევე, დაადგინოს ავტობუსების ხარისხის შესაბამისობა კონტრაქტით გათვალისწინებულ მოთხოვნებთან და გამოვლენილი ხარვეზების შემთხვევაში, განახორციელოს სათანადო რეაგირება;
• შეიმუშაოს და დანერგოს სამშენებლო სამუშაოების მიღება-ჩაბარებისა და მონიტორინგის წესი, რომელშიც დეტალურად იქნება გაწერილი მოქმედი სტანდარტების დაცვით სამუშაოების შესრულებისათვის საჭირო კონტროლის მექანიზმები. დოკუმენტით ნათლად უნდა განისაზღვროს, კონტროლის თითოეულ ეტაპზე ჩასატარებელი სამუშაოები და კონტროლის განმახორციელებელი პირები, მათი მოვალეობები და პასუხისმგებლობები. რეგულარულად აწარმოოს შესყიდული ობიექტების მონიტორინგი და ხარვეზების გამოვლენის შემთხვევაში, აამოქმედოს გარანტიის მექანიზმი, ნაკლოვანებების/ხარვეზების დროულად აღმოფხვრის მიზნით. აღნიშნული ხელს შეუწყობს კონტროლის მექანიზმების გამართულ ფუნქციონირებას, პროექტის შემოწმებისათვის საჭირო ყველა პროცედურის სათანადოდ წარმართვასა და ხარისხიანი პროექტების ჩაბარებას. ამასთანავე, მუნიციპალიტეტმა შეისწავლოს ინფრასტრუქტურული ობიექტების დაზიანების გამომწვევი მიზეზები და უზრუნველყოს მათი აღმოფხვრა;
• ქონების გაყიდვამდე საწყისი საპრივატიზებო ღირებულება განსაზღვროს დამოუკიდებელი აუდიტორის შეფასების საფუძველზე. ამასთანავე, აუქციონის პირობები დააწესოს მხოლოდ მუნიციპალიტეტის სოციალურ-ეკონომიკური განვითარების მიზნებისა და მოსახლეობის ინტერესების გათვალისწინებით. აღნიშნული გააუმჯობესებს კონკურენტულ გარემოს და გაზრდის ქონების რეალიზებით მიღებულ სარგებელს. გარდა ამისა, გააანალიზოს ქონების გასხვისების პროცესში დაშვებული დარღვევები და გაატაროს ღონისძიებები შესაბამისი პასუხისმგებელი პირების მიმართ;
• შეიმუშაოს კონტროლის სათანადო მექანიზმები, რომლებიც უზრუნველყოფს ქონების განკარგვის ხელშეკრულებებით გათვალისწინებული პირობების შესრულებას. ამასთანავე, საკუთრებაში არსებული ქონების მართვისა და განკარგვის გასაუმჯობესებლად, ჩაატაროს მიუღებელი თანხების ინვენტარიზაცია და გაატაროს შესაბამისი ღონისძიებები კუთვნილი თანხების მისაღებად;
• შესყიდვების პროცესში დანერგოს/შექმნას დამატებითი კონტროლის მექანიზმები, რომელებიც უზრუნველყოფს ინტერესთა კონფლიქტების შემთხვევების გამოვლენასა და მათზე სათანადო რეაგირებას; ბაზრის კვლევის პროცესი წარმართოს იმგვარად, რომ შემსყიდველ ორგანიზაციას შეექმნას მაქსიმალურად სრულყოფილი სურათი ბაზარზე არსებული შემოთავაზებებისა და პოტენციური მიმწოდებლების შესახებ, რაც, თავის მხრივ, განაპირობებს ტენდერების კონკურენტულ გარემოში ჩატარებას, პროდუქტის ეკონომიურად შეძენასა და შემსყიდველი ორგანიზაციის ინტერესების დაცვას. ამასთანავე, შეისწავლოს იმ პირთა პასუხისმგებლობის საკითხი, რომელთაც ევალებოდათ ინტერესთა კონფლიქტის გამოვლენა და მათ მიმართ გაატაროს კანონით განსაზღვრული ღონისძიებები.

ქალაქ ქუთაისის მუნიციპალიტეტის საკრებულომ და მერიამ:

• შეიმუშაონ წესი, რითაც დარეგულირდება სამსახურებრივი უფლებამოსილების განსახორციელებლად საჭირო სამორიგეო ავტომანქანების რაოდენობა და განისაზღვრება საწვავისა და მოვლა- შენახვის ხარჯვის კონტროლის მექანიზმები. საწვავის არამიზნობრივად ხარჯვის პრევენციის მიზნით, მიზანშეწონილია, მერიამ დანერგოს კონტროლის დამატებითი მექანიზმ(ებ)ი და შეიმუშაოს სათანადო პროცედურები. მათ შორის, ალტერნატიულ პროცედურად შესაძლოა, განხილულ იქნეს, ავტოსატრანსპორტო საშუალებების პერიოდული ინვენტარიზაციისას, უფლებამოსილი პირების მიერ დამონტაჟებული საწვავის „ჩიპების“ მთლიანობის შემოწმება; სამორიგეო ავტომობილების სამსახურებრივი დანიშნულებით გამოყენების მონიტორინგის მიზნით, კარგი პრაქტიკის გათვალისწინებით, ასევე, შესაძლოა, განხილულ იქნეს სატელიტური (GPS) ან სხვა სახის ელექტრონული კონტროლის სისტემის დანერგვა.