სახელმწიფო აუდიტის სამსახური

შემსყიდველ ორგანიზაციებს

რეკომენდაცია №1:

• საჭიროების სწორად განსაზღვრის მიზნით, შეიქმნას ეფექტიანი კონტროლის მექანიზმი, რომელიც უზრუნველყოფს პრიორიტეტების ჩამოყალიბებას დაგეგმვის ადრეულ ეტაპზე და შესაბამის სამსახურებს (საფინანსო, შესყიდვები, ლოგისტიკა) შორის კომუნიკაციით განისაზღვრება შესასყიდი საქონლის/მომსახურების საჭირო რაოდენობა და მოცულობა, სადაც გათვალისწინებული იქნება დაწესებულების ფინანსური და ტექნიკური შესაძლებლობები, არსებული სასაქონლო ნაშთები;
• წინასწარი ანგარიშსწორების ეფექტიანი გამოყენების მიზნით, შეიქმნას ეფექტიანი კონტროლის მექანიზმი, რომელიც უზრუნველყოფს შესაბამისი ანალიზის განხორციელებას, რამდენად საჭიროებს შესყიდვა წინასწარ დაფინანსებას და რამდენად აუცილებელია აღნიშნული მიმწოდებლის მიერ ვალდებულებების ჯეროვნად შესრულებისათვის. ამ პროცესში გათვალისწინებული უნდა იყოს, რომ წინასწარი ანგარიშსწორება წლის ბოლოს საბიუჯეტო ასიგნების ათვისებისაკენ არ იყოს მიმართული.

რეკომენდაცია №2:

საბაზრო პირობებისადმი ადეკვატური სავარაუდო ღირებულების განსაზღვრის და საჯარო სახსრების არარაციონალური ხარჯვის რისკების თავიდან აცილების მიზნით, შეიქმნას ეფექტიანი კონტროლის მექანიზმი, რომელიც უზრუნველყოფს ბაზრის კვლევის ეტაპზე ყველა ხელმისაწვდომი ინფორმაციის შესწავლას და ანალიზს, მათ შორის, ფასების შესახებ მიღებული ინფორმაციის ერთგვაროვნებას (შესადარისობა) მიწოდების კომერციული და ფინანსური პირობების (წარმოშობის ქვეყანა, ანგარიშსწორების პირობები, საგარანტიო ვადა და ა.შ.) გათვალისწინებით.

რეკომენდაცია №3:

ჯანსაღი კონკურენტული გარემოს უზრუნველსაყოფად, შეიქმნას ეფექტიანი კონტროლის მექანიზმი, რომელიც უზრუნველყოფს, შესყიდვის საგნის აღწერისას უპირატესობა მიენიჭოს საქონლის ფუნქციონალურ-ტექნიკური სპეციფიკაციების შემუშავებას და ტექნიკური პარამეტრები განისაზღვროს ისეთ დიაპაზონში, რომელიც შემსყიდველის საჭიროებებს დააკმაყოფილებს. აღნიშნული პროცესის განხორციელებისას გათვალისწინებული უნდა იყოს ბაზრის კვლევის შედეგად მიღებული ინფორმაცია და შესაბამისი კომპეტენციის მქონე სპეციალისტების დასკვნები (შეფასებები), რათა გაიზარდოს ბაზარზე არსებული ეკონომიკური ოპერატორების შესყიდვაში მონაწილეობის შესაძლებლობა.

რეკომენდაცია №4:

შესყიდვის პროცედურებში თანაბარზომიერი და პროპორციული მიდგომების ჩამოყალიბების მიზნით, შეიქმნას ეფექტიანი კონტროლის მექანიზმი, რომელიც უზრუნველყოფს პრეტენდენტთა მიმართ ტექნიკური და ფინანსური ხასიათის მოთხოვნების შემუშავებას დეტალური ანალიზის, მათ შორის, ბაზრის კვლევის პროცედურებიდან მიღებული და საჯაროდ ხელმისაწვდომი ინფორმაციების საფუძველზე. აღნიშნულმა საშუალება უნდა მისცეს კვალიფიციურ პრეტენდენტებს, მონაწილეობა მიიღონ სატენდერო პროცედურებში და დადგენილი მოთხოვნები არ გახდეს კონკურენტული გარემოს უზრუნველყოფის დამაბრკოლებელი ფაქტორი.

რეკომენდაცია №5:

შესყიდვებში მონაწილე პირთა მიმართ გამჭვირვალე, ერთგვაროვანი მიდგომისა და ფინანსური სახსრების ეკონომიური ხარჯვის უზრუნველყოფის მიზნით:

• შემუშავდეს და დაინერგოს კონტროლის მექანიზმები, რომლებიც უზრუნველყოფს სატენდერო კომისიების ეფექტიან ფუნქციონირებას, რამაც მნიშვნელოვნად უნდა შეამციროს დაუსაბუთებელი და არამართლზომიერი გადაწყვეტილებების რისკები;
• შესაბამისი პირობების არსებობის შემთხვევაში, შემუშავდეს კონტროლის მექანიზმები დაზუსტების შესაძლებლობის სწორად და მართლზომიერად გამოყენებისათვის, რომელიც უზრუნველყოფს სატენდერო დოკუმენტაციით განსაზღვრული მოთხოვნების შესრულების შესახებ, დამატებითი მტკიცებულებების (დოკუმენტები და განმარტებები) მიღებას.

რეკომენდაცია №6:

ქვეკონტრაქტორის სამუშაოების ეფექტიანი მართვის მიზნით, შექმნან შიდა კონტროლის გარემო და მექანიზმები, რომლებიც უზრუნველყოფს შესაბამისი კრიტერიუმების საფუძველზე კვალიფიციური ქვეკონტრაქტორის შერჩევას და მონიტორინგს.

სახელმწიფო შესყიდვების სააგენტოს

რეკომენდაცია №7:

გამარტივებული შესყიდვების გამოყენების თაობაზე მიღებული გადაწყვეტილებების კანონშესაბამისობის უზრუნველსაყოფად:

• ამაღლდეს არსებული კონტროლის მექანიზმების ეფექტიანობა ან/და დაინერგოს ახალი კონტროლის მექანიზმები, რომლებიც აღნიშნული შესყიდვის საშუალების გამოყენების თაობაზე თანხმობის გაცემის პროცესში, გაზრდის მისი გამოყენების დასაბუთების ხარისხს;
• არსებული რესურსის პირობებში შემუშავდეს რისკების შეფასების სისტემა და მონიტორინგის მექანიზმი, რომელიც უზრუნველყოფს ნებართვის გაცემის შემდგომ შემსყიდველის მიერ მიღებულ გადაწყვეტილებებს, ასევე ფაქტობრივ გარემოებებსა და თანხმობის გაცემის საფუძვლებს (კრიტერიუმებს) შორის „გადახრების“ იდენტიფიცირებას და შემდგომ რეაგირებას.