მაღალი მიღწევების სპორტის განვითარების ხელშეწყობის აუდიტის ანგარიში

კულტურისა და სპორტის სამინისტროს 2020-2030 წლების სამოქმედო გეგმის ფარგლებში, ეროვნული მნიშვნელობის პრიორიტეტად განსაზღვრულია მასობრივი და მაღალი მიღწევის სპორტისა და ჯანსაღი ცხოვრების წესის ხელშეწყობა. სამინისტრო მხარს უჭერს და აფინანსებს იმ ფედერაციებს, რომელთა პოლიტიკაც ითვალისწინებს მასობრივი და მაღალი მიღწევების სპორტის ხელშეწყობასა და ხელმისაწვდომობას.

ყოველწლიურად სახელმწიფოს მხრიდან სპორტის სფეროს ხელშესაწყობად მიმართულია, საშუალოდ 170 მილიონ ლარამდე, რაც მთლიანი ხარჯის 0,9%-ს შეადგენს და მცირედით აღემატება ევროკავშირის საშუალო მაჩვენებელს. სპორტზე გაწეული ხარჯების წილი მთლიან შიდა პროდუქტთან მიმართებით 0,28%-ს შეადგენს, ხოლო ანალოგიური საერთაშორისო გასაშუალოებული მაჩვენებელი − 0,4%-ია.

მასობრივი და მაღალი მიღწევების სპორტის განვითარების და პოპულარიზაციის პროგრამის ფარგლებში სხვადასხვა სპორტული სახეობის მხარდაჭერის მიზნით ყოველწლიურად საშუალოდ 125 233 40118 ლარი იხარჯება. მოცემული თანხის 36% მიმართულია ორი სპორტული სახეობის − ფეხბურთის და კალათბურთის განვითარებაზე.

აღსანიშნავია, რომ სპორტის სახელმწიფო პოლიტიკის დოკუმენტში სტრატეგიული მიზნის ფორმალურ დეკლარირებას არ მოჰყოლია კონკრეტული სამოქმედო გეგმის შემუშავება ან სამიზნე ინდიკატორების განსაზღვრა. სპორტის სახელმწიფო პოლიტიკის დოკუმენტში გაზომვადი ინდიკატორების არარსებობის გამო რთულია შეფასდეს, რამდენად არის სტრატეგიით დასახული მიზანი მიღწეული.

კულტურისა და სპორტის სამინისტროს

რეკომენდაცია №1

სპორტის ინფრასტრუქტურული პროექტების სათანადოდ დაგეგმვის მიზნით, სამინისტრომ ადგილობრივ ხელისუფლებასთან, ფედერაციებთან და სხვა შესაბამის მხარეებთან თანამშრომლობით დანერგოს მექანიზმი, რომელიც უზრუნველყოფს სრული, ზუსტი და განახლებული ინფორმაციის მიღებას მათ ადმინისტრაციულ ტერიტორიაზე ან/და საკუთრებაში არსებული სპორტული ინფრასტრუქტურის შესახებ.

რეკომენდაცია №2

სახელმწიფოს საკუთრებაში არსებული სპორტული ინფრასტრუქტურის პროდუქტიულად გამოყენების და ამავდროულად ინფრასტრუქტურაზე კლუბების ხელმისაწვდომობის გაზრდის მიზნით, სამინისტრომ შესაბამის მხარეებთან კოორდინაციით შეიმუშაოს პოლიტიკა კლუბებისთვის სპორტული ობიექტებით სარგებლობის შესახებ.

რეკომენდაცია №3

სამინისტრომ სპორტში ბავშვებისა და მოზარდების ჩართულობის, ასევე მუნიციპალიტეტების მიერ ბავშვებისთვის/მოზარდებისთვის შეთავაზებული სპორტული წრეების შესახებ მოსახლეობის ინფორმირებულობის გაზრდისა და ეროვნულ დონეზე სპორტის პრიორიტეტული მიმართულებების ხელშეწყობის მიზნით, მოცემული მიმართულებით შეიმუშაოს პოლიტიკა მუნიციპალიტეტებთან და შესაბამის დაინტერესებულ მხარეებთან კოორდინაციისათვის.

რეკომენდაცია №4

ნიჭიერ სპორტსმენთა გამოვლენისა და განვითარების მიზნით, სამინისტრომ საკუთარი კომპეტენციის ფარგლებში, შესაბამის სპორტულ ფედერაციებთან, ადგილობრივ ხელისუფლებასთან და სხვა დაინტერესებულ მხარეებთან კოორდინაციით, შეიმუშაოს ბავშვებში/მოზარდებში ნიჭის გამოვლენისა და განვითარების სისტემა, რომელიც ხელს შეუწყობს შესაბამისი მახასიათებლების მქონე სპორტსმენის აღმოჩენას, განვითარებასა და შესაძლებლობების რეალიზებას.

ა(ა)იპ − ფეხბურთის განვითარების ფონდს

რეკომენდაცია №5

საფეხბურთო ლიგებისთვის თანაბარი მხარდამჭერი მექანიზმების უზრუნველყოფის მიზნით, რეგიონალურ ლიგასთან მიმართებით შეფასდეს საბაზისო დაფინანსების ფარგლებში განსაზღვრული პრიორიტეტების მიზანშეწონილობა.

რეკომენდაცია №6

საბიუჯეტო სახსრების ეფექტიანად ხარჯვის მიზნით საგანმანათლებლო პროგრამების დაფინანსების ფარგლებში დაინერგოს მექანიზმები, რომლებიც შესაბამის მხარეებთან კოორდინაციით უზრუნველყოფს მიღწეული შედეგების მონიტორინგს.

რეკომენდაცია კალათბურთის ეროვნულ ფედერაციას

რეკომენდაცია №7

საბიუჯეტო სახსრების ეფექტიანად განკარგვის მიზნით დაინერგოს მონიტორინგის მექანიზმი, რომელიც უზრუნველყოფს საკალათბურთო კლუბებიდან მტკიცებულებაზე დაფუძნებული ინფორმაციის მიღებას კლუბების მიერ საბაზისო დაფინანსების ფარგლებში მიღებული საბიუჯეტო სახსრების ხარჯვასთან დაკავშირებით.

რეკომენდაცია №8

მწვრთნელთა ლიცენზირების პროგრამის ეფექტიანად დაგეგმვის, სათანადო კვალიფიკაციის მქონე მწვრთნელების მომზადებისა და საიმედო შეფასების სისტემის დანერგვის მიზნით:
• გაიწეროს ლიცენზირების სასწავლო პროგრამა ეტაპების მიხედვით და განისაზღვროს ლიცენზიის მოქმედების გონივრული ვადა;
• შემუშავდეს A კატეგორიის მწვრთნელთა ლიცენზიის სასწავლო პროგრამა;
• შეფასდეს სასწავლო მასალისა და სასწავლო საათების რელევანტურობა პროგრამის მიზნებთან მიმართებით;
• დაინერგოს სალიცენზიო ტესტირების ეფექტიანი მექანიზმი.