დღეს კონტროლის პალატაში გაიმართა შეხვედრა, რომელშიც მონაწილეობდნენ GIZ -ის (გერმანიის საერთაშორისო თანამშრომლობის საზოგადოება) მთავარი ოფისის წარმომადგენლები - ნიკოლ ბოტა, უფროსი დაგეგმვის ოფიცერი და იენს დეპე, დაგეგმვის ოფიცერი. შეხვედრის მიზანი იყო გასული, 2010 წლის თანამშრომლობის მიღწევების შეფასება და იმ საჭიროებათა და გამოწვევების განსაზღვრა, რომელთა წინაშეც დგას დღეს კონტროლის პალატა. ასევე, ზოგადად იქნა განხილული მომავალი თანამშრომლობის მთავარი საკითხები.
GIZ (წარსულში GTZ, გერმანიის ტექნიკური თანამშრომლობის საზოგადოება) 2003 წლიდან მხარს უჭერს კონტროლის პალატას. ამ ხნის მანძილზე, მხარეებს შორის გაფორმებული თანამშრომლობის მემორანდუმის ფარგლებში, მიმდინარეობდა აქტიური თანამშრომლობა, რომელიც მოიცავდა ბევრ საკითხს, როგორიცაა, თანამშრომლების ტრენინგი, ეფექტიანობის აუდიტის დანერგვა და საპილოტე აუდიტების ჩატარება, კანონმდებლობის სტანდარტების ანალიზი და გამოცდილების გაზიარება ადგილობრივი თვითმმართველობის აუდიტის სფეროში. ორივე მხარის მიერ წარმატებული თანამშრომლობის შედეგად, არსებული შეთანხმება განახლდება ხვალ, 18 მარტს. საქართველოს კონტროლის პალატის თბილისის ოფისში ხელი მოეწერება თანამშრომლობის ახალ მემორანდუმს, რომელიც განსაზღრავს მომავალი საქმიანობის ძირითად მიმართულებებს.