2025 წლიდან სახელმწიფო აუდიტის სამსახური მთავრობის კონსოლიდირებული ფინანსური ანგარიშგების აუდიტს ჩაატარებს, რაც უზრუნველყოფს სახელმწიფო ბიუჯეტის სრულ დაფარვას და ქვეყნის ფინანსური აღრიცხვისა და ანგარიშგების სისტემის ფართო ზედამხედველობას.
მთავრობის კონსოლიდირებული ფინანსური ანგარიშგების აუდიტის წინაპირობაა საგადასახადო შემოსავლების ფინანსური აუდიტი, რომელიც სახელმწიფო აუდიტის სამსახურმა პირველად გასულ წელს ჩაატარა და 2024 წლის აუდიტის გეგმაშიც არის გათვალისწინებული.
ამ მიმართულებით შესაძლებლობების გაძლიერებისთვის სახელმწიფო აუდიტის სამსახური საერთაშორისო პრაქტიკას სწავლობს. აუდიტორებმა უკვე გაიარეს მსოფლიო ბანკის ექსპერტების ტრენინგები.
სახელმწიფო აუდიტის სამსახური ასევე იზიარებს ლატვიის უმაღლესი აუდიტორული ორგანიზაციის გამოცდილებას. ლატვიელმა ექსპერტებმა მთავრობის კონსოლიდირებული ფინანსური ანგარიშგების აუდიტისა და ფინანსურ აუდიტში IT კონტროლების ტესტირების მეთოდების გამოყენების საერთაშორისო პრაქტიკებთან დაკავშირებით, სახელმწიფო აუდიტის სამსახურის აუდიტორებისთვის სემინარი ჩაატარეს.
აღსანიშნავია, რომ კონსოლიდირებული ფინანსური ანგარიშგების აუდიტში ლატვია ერთ-ერთი წამყვანი უმაღლესი აუდიტორული ორგანიზაციაა.
