აუდიტის დეპარტამენტმა აჭარის ავტონომიურ რესპუბლიკაში განახორციელა ხელვაჩაურის მუნიციპალიტეტის 2012 წლის ფინანსური და შესაბამისობის აუდიტი. აუდიტის შედეგად გამოვლინდა შემდეგი დარღვევა - ნაკლოვანებები:
- ხელვაჩაურის მუნიციპალიტეტის მიერ შესყიდული 110 493 ლარის სხვადასხვა სამშენებლო მასალების ფაქტობრივი ხარჯვის დამადასტურებელი დოკუმენტაცია ვერ იქნა წარმოდგენილი, რაც საბიუჯეტო სახსრების მართვის არაეფექტიანობაზე მიუთითებს.
- ხელვაჩაურის მინიციპალიტეტის ტერიტორიის დაგვა-დასუფთავებით სამუშაობზე ხელშეკრულების პირობების შეუსაბამოდ გადახდილია 5 760 ლარი და არ იქნა დარიცხული პირგასამტეხლო - 19 565,7 ლარის ოდენობით, რაც საბიუჯეტო სახსრების არამიზნობრივ/არაპროდუქტიულ განკარგვაზე მიუთითებს.
- ხელვაჩაურის მუნიციპალიტეტში საბავშვო ბაღის, საჯარო სკოლისა და წყალმომარაგების მოწყობის სამუშაოებთან დაკავშირებით, სათანადო დასაბუთების გარეშე სამუშაოების შესრულების ვადის გაგრძელება და სამუშაოების არაჯეროვნად შესრულების პირობებში ხელშეკრულების უზრუნველყოფის საბანკო გარანტიის უკან დაბრუნება, 23 940 ლარის საბიუჯეტო სახსრების არაპროდუქტიულ განკარგვაზე მიუთითებს.
- ხელვაჩაურის მუნიციპალიტეტში განხორციელებულ 292 915 ლარის ღირებულების სამშენებლო-სარეკონსტრუქციო სამუშაოებზე წარმოდგენილი არ არის საპროექტო-სახარჯთაღრიცხვო დოკუმენტაცია, რაც საბიუჯეტო სახსრების არაეკონომიურ განკარგვაზე მიუთითებს.
აუდიტის შედეგად გამოვლენილ ნაკლოვანებებთან დაკავშირებით, აუდიტის დეპარტამენტის მიერ გაცემულ იქნა შესაბამისი რეკომენდაციები. ამასთანავე, აუდიტის ანგარიში შემდგომი შესწავლის მიზნით გადაეგზავნა სამართალდამცავ ორგანოებს.
