აუდიტის დეპარტამენტმა აჭარის ავტონომიურ რესპუბლიკაში განახორციელა შუახევის მუნიციპალიტეტის 2012-2013 წლების ფინანსური და შესაბამისობის აუდიტი. აუდიტის შედეგად გამოვლინდა შემდეგი დარღვევა-ნაკლოვანებები:
მუნიციპალიტეტის მიერ, პროგრამებისა და ღონისძიებების არასათანადო დაგეგმვისა და მიმწოდებელზე სახელშეკრულებო პირობების დარღვევისათვის არასათანადო რეაგირების შედეგად, 2013 წლის ბიუჯეტიდან არ არის განხორციელებული ხიჭაურის ცენტრის კეთილმოწყობის მიზნობრივი პროგრამა და შეუსრულებელია 56 162 ლარის ღირებულების სამუშაოები.
აგრეთვე მნიშველოვანი ხარვეზები ფიქსირდება სახელმწიფო შესყიდვების განხორციელების პროცესში, მაგალითად:
2012 წელს ავტოსადგურის ტერიტორიაზე არსებული ობიექტების ერთიანი ფასადის მოწყობის სამუშაოებთან დაკავშირებით, მუნიციპალიტეტის მიერ მიწოდების ვადის გაგრძელება უსაფუძვლოა და შესაძლოა მიმწოდებელზე 2010 ლარის ოდენობის პირგასამტეხლოს დაკისრების თავიდან აცილებაზე იყოს მიმართული;
2013 წელს რიგ სოფლებში წყლის საძიებო ჭაბურღილების მოწყობის სამუშაოებთან დაკავშირებით, სათანადო დასაბუთების გარეშე,განხორციელდა სამუშაოების შესრულების ვადის გაზრდა, რაც შესაძლოა მიმწოდებელზე 4 903 ლარის ოდენობის პირგასამტეხლოს დაკისრების თავიდან ასაცილებლად იყოს მიმართული.
2012 წელს ჭვანის თემში ხიდის მშენებლობასთან დაკავშირებით, შესასრულებელი სამუშაოების ღირებულებაზე პროცენტულად დამატებულია სატრანსპორტო ხარჯები 2 პროცენტის ოდენობით, რაც ზედნადები ხარჯებისა და გეგმური დაგროვების ჩათვლით, შეადგენს 1 288 ლარს, რითაც დარღვეულია მოქმედი კანონმდებლობის მოთხოვნები.
გამოვლენილ დარღვევა-ნაკლოვანებებზე გაიცა შესაბამისი რეკომენდაციები, რომელთა გათვალისწინებაც ხელს შეუწყობს ფინანსების მართვის პროცესის გაუმჯობესებას.
იხ. ანგარიშის სრული ვერსია: 2012 და 2013
