აუდიტის დეპარტამენტმა აჭარის ავტონომიურ რესპუბლიკაში განახორციელა შპს „ბათუმის N1 პოლიკლინიკის“ 2013 წლის ფინანსური და შესაბამისობის აუდიტი. აუდიტის შედეგად გამოვლინდა რიგი დარღვევა-ნაკლოვანებები, კერძოდ:
შპს „ბათუმის N1 პოლიკლინიკის“ სარგებლობაშია სახელმწიფოს, ქალაქ ბათუმის მუნიციპალიტეტის და შპს „ბათუმის რესპუბლიკური კლინიკური საავადმყოფოს“ საკუთრებაში არსებული უძრავი და მოძრავი ქონება, რომლის სარგებლობის უფლების დამადასტურებელი რაიმე სახის დოკუმენტი ვერ იქნა წარმოდგენილი.
პოლიკლინიკის დირექტორის 2013 წლის ხელფასმა შეადგინა 37038 ლარი, საიდანაც პარტნიორის მიერ დანიშნული ხელფასი შეადგენს მხოლოდ 14400 ლარს, ხოლო დანარჩენი 22638 ლარის დარიცხვა და გაცემა განხორციელებულია პარტნიორთან შეთანხმების გარეშე.
პოლიკლინიკის მიერ სახელმწიფო შესყიდვების შესახებ ზოგიერთ ხელშეკრულებაში არ არის გათვალისწინებული შესყიდვის საშუალებებისთვის დადგენილი მონეტარული ზღვრები. ასევე ფიქსირდება შესყიდვების მარეგულირებელი კანონმდებლობის სხვა სახის დარღვევები.
აღნიშნულ ხარვეზებთან დაკავშირებით აუდიტის დეპარტამენტის მიერ გაცემულ იქნა შესაბამისი რეკომენდაციები, რომელთა გათვალისწინებაც ხელს შეუწყობს კომპანიის მართვის პროცესის გაუმჯობესებას.
