დღეს, 25 მარტს, სახელმწიფო აუდიტის სამსახურსა და შვედეთის ეროვნულ აუდიტორულ ოფისს (SNAO) შორის გაფორმდა ურთიერთგაგების მემორანდუმი, რომელიც მიზნად ისახავს მხარეებს შორის თანამშრომლობის გაგრძელებას 2014-2016 წლებში ეფექტიანობის აუდიტის მიმართულებით. მემორანდუმი ხელს შეუწყობს სახელმწიფო აუდიტის სამსახურში ეფექტიანობის აუდიტის განხორციელებას უმაღლესი აუდიტორული ორგანოების საერთაშორისო სტანდარტების (ISSAI) შესაბამისად.
ურთიერთგაგების მემორანდუმს ხელი მოაწერეს სახელმწიფო აუდიტის სამსახურის გენერალურმა აუდიტორმა, ლაშა თორდიამ და შვედეთის ეროვნული აუდიტორული ოფისის გენერალურმა აუდიტორმა, იან ლანდალმა.
შეხვედრას დაესწრნენ: პარლამენტის საფინანსო-საბიუჯეტო კომიტეტის თავმჯდომარე დავით ონოფრიშვილი, ფინანსთა მინისტრის მოადგილე დავით ლეჟავა, ევროკავშირის დელეგაცია, ფილიპ დიმიტროვის ხელმძღვანელობით, შვედეთის ელჩი საქართველოში დიანა იანსე, ეროვნულ-დემოკრატიული ინსტიტუტის (NDI) საქართველოს ოფისის დირექტორი ლუის ნავარო, საარჩევნო სისტემების საერთაშორისო ფონდის (IFES) ხელმძღვანელი ნერმინ ნისიჩი, აგრეთვე საერთაშორისო და არასამთავრობო ორგანიზაციების წარმომადგენლები.
