2017 წლის 23-25 და 30-31 იანვარს, სახელმწიფო აუდიტის სამსახურმა მონაწილეობა მიიღო დონორების მიერ (EU/UNDP, WFD, NDI, USAID/GGI) ორგანიზებულ პარლამენტის წევრების საორიენტაციო პროგრამაში. აღნიშნული პროგრამა გათვალისწინებულია ახლადარჩეული პარლამენტის წევრებისთვის (რომლებიც არ ყოფილან ბოლო მოწვევის პარლამენტში) და ძირითადად ეხება მათი კონსტიტუციით განსაზღვრული უფლებამოსილებების განხორციელებას.
პროგრამაში მონაწილეობდა 70-მდე პარლამენტის წევრი, რომლებიც მუშაობდნენ 5 ჯგუფად. სასწავლო კურსის განმავლობაში სხვა თემებთან ერთად, საქართველოს პარლამენტის წევრები გაეცნენ საჯარო ფინანსების მართვის პროცესში სახელმწიფო აუდიტის სამსახურის როლს, მის ძირითად ფუნქციებსა და ანგარიშებს. ამასთანავე, პრეზენტაციის ფარგლებში განხილულ იქნა, თუ როგორ უზრუნველყოფს აუდიტის სამსახური თავისი საქმიანობით პარლამენტის ხელშეწყობას საპარლამენტო კონტროლის განხორციელების პროცესში და როგორ შეიძლება აუდიტის სამსახურის ანგარიშებში წარმოდგენილი შედეგებისა და რეკომენდაციების გამოყენება. პრეზენტაცია მიმდინარეობდა დისკუსიის ფორმატში.
