2013 წლის 28 ივნისს, სახელმწიფო აუდიტის სამსახურის გენერალურმა აუდიტორმა, ლაშა თორდიამ საქართველოს პარლამენტს სახელმწიფო აუდიტის სამსახურის 2012 წლის საქმიანობის ანგარიში წარუდგინა.
ანგარიში მოიცავს დეტალურ ინფორმაციას სახელმწიფო აუდიტის სამსახურის 2012 წლის საქმიანობის შესახებ ძირითადი მიმართულებების მიხედვით, მათ შორის: ჩატარებული ეფექტიანობის აუდიტების შედეგად გამოვლენილ გარემოებებს, ასევე სახელმწიფო აუდიტის სამსახურის დასკვნებსა და მოხსენებებში ასახულ იმ სისტემური ხასიათის პრობლემებს, რომლებიც გავლენას ახდენს საჯარო ფინანსების მართვის ეფექტიანობაზე, როგორც სახელმწიფო ბიუჯეტის დონეზე, ისე ადგილობრივი თვითმმართველი ერთეულებისათვის. გარდა ამისა, ანგარიშში მოცემულია კონკრეტული უწყებების ფინანსური და/ან შესაბამისობის აუდიტების შედეგად გამოვლენილი მნიშვნელოვანი საკითხები სახელმწიფო აუდიტის სამსახურის აუდიტორული საქმიანობის პრიორიტეტების მიხედვით, აგრეთვე სამსახურის საქმიანობა ინსტიტუციური განვითარების, პოლიტიკური პარტიების ფინანსური მონიტორინგისა და სხვა მიმართულებებით.
ანგარიშის მიხედვით, სახელმწიფო აუდიტის სამსახურმა 2012 წელს ჩაატარა სულ 57 აუდიტი, მათ შორის, 41 - ფინანსური, 13 - შესაბამისობის და 3 - ეფექტიანობის აუდიტი. აუდიტორულმა საქმიანობამ მოიცვა 2,803,589 ათასი ლარის ოდენობის საბიუჯეტო სახსრები და გამოვლენილი დარღვევების თანხობრივმა მოცულობამ 44,481 ათასი ლარი შეადგინა.
სახელმწიფო აუდიტის სამსახურის მიერ 2012 წლის აუდიტორული საქმიანობის შედეგად გაცემულ იქნა 172 რეკომენდაცია, რომლებიც ორიენტირებულია საჯარო ფინანსების მართვის გაუმჯობესებასა და ეფექტიანობის ამაღლებაზე.
