დღეს, 28 ნოემბერს, სახელმწიფო აუდიტის სამსახურში გაიმართა ევროკავშირის მიერ დაფინანსებული საჯარო სამსახურების დაძმობილების (TWINNING) ახალი პროექტის პრეზენტაცია.
პროექტის მიზანია სახელმწიფო მართვის სექტორში საჯარო ფინანსების განკარგვის ანგარიშვალდებულების გაუმჯობესება, სახელმწიფო აუდიტის სამსახურის მენეჯმენტისა და ტექნიკური შესაძლებლობების გაძლიერება, ევროკავშირისა და საერთაშორისო სტანდარტების შესაბამისად, აუდიტის დაგეგმვა-განხორციელების ხელშეწყობა.
პროექტის ფარგლებში პროფესიული ცოდნისა და უნარების გაზიარება დაეხმარება საქართველოს სახელმწიფო აუდიტის სამსახურს გააუმჯობესოს მუშაობის მეთოდების სტანდარტები და გამჭვირვალობა. უმაღლესი აუდიტორული ორგანო უზრუნველყოფილი იქნება მაღალკვალიფიციური კადრებითა და თანამედროვე მართვის სისტემებითა და პროცესებით.
სახელმწიფო აუდიტის სამსახურის მხარდასაჭერად, პროექტს განახორციელებს გერმანულ-პოლონური კონსორციუმი გერმანიის უმაღლესი აუდიტორული ორგანოს - Bundesrechnungshof (BRH) ხელმძღვანელობითა და პოლონეთის უმაღლესი აუდიტის სამსახურის - Najwyższa Izba Kontroli (NIK) მხარდაჭერით, სახელმწიფო აუდიტის სამსახურთან თანამშრომლობით 24 თვის განმავლობაში.
პროექტის ბიუჯეტი შეადგენს 1.17 მილიონ ევროს. პროექტი უზრუნველყოფს დახმარებას ევროპის სამეზობლო და პარტნიორობის ინსტრუმენტის ფარგლებში (ENPI), რომელიც მხარს უჭერს დემოკრატიულ განვითარებას, კანონის უზენაესობასა და ეფექტიან მმართველობას. პროექტი პირდაპირ უკავშირდება საქართველო-ევროკავშირის ასოცირების ხელშეკრულების 1.2 ქვემუხლს, რომელიც მიზნად ისახავს „დემოკრატიის გაძლიერებისა და პოლიტიკური, ეკონომიკური და ინსტიტუციური სტაბილურობის ხელშეწყობას საქართველოში“.
საჯარო სამსახურების დაძმობილება (TWINNING) არის ევროკავშირის წევრ და მიმღებ ქვეყნებს შორის თანამშრომლობის ინსტრუმენტი. მიმღებ ქვეყნებს განეკუთვნება ევროკავშირში გაწევრიანების კანდიდატი და პოტენციური კანდიდატი სახელმწიფოები, აგრეთვე ევროპის სამეზობლო პოლიტიკის ფარგლებში მოქცეული ქვეყნები.
