სახელმწიფო აუდიტის სამსახურმა ჩაატარა საქართველოს ცენტრალური საარჩევნო კომისიის 2011 წლის ფინანსური და შესაბამისობის აუდიტი.
ფინანსური აუდიტის მიზანს წარმოადგენდა 2011 წლის 31 დეკემბრის მდგომარეობით მომზადებული ნაერთი ფინანსური ანგარიშგების შესახებ მოსაზრების გამოთქმა. ნაერთ ფინანსურ ანგარიშგებაში წარმოდგენილია ცესკოს ქვემდგომი ორგანოების, ცესკოს კონტროლს დაქვემდებარებული - სსიპ ,,საარჩევნო სისტემების განვითარების, რეფორმებისა და სწავლების ცენტრისა“ და დამოუკიდებელი ადმინისტრაციული ორგანოს - ,,ამომრჩეველთა სიების დაზუსტების უზრუნველყოფის კომისიის“ ფინანსური ინფორმაცია. ზემოთ ხსენებული ორგანოების საქმიანობის მოქმედ კანონმდებლობასა და მარეგულირებელ ნორმებთან შესაბამისობის დადგენა კი განხორციელდა შესაბამისობის აუდიტის ფარგლებში.
აუდიტის შედეგად გამოვლენილი საკითხების ფინანსურ ანგარიშგებაზე გავლენის მნიშვნელობის გამო სახელმწიფო აუდიტის სამსახურმა არ გამოთქვა აუდიტორული მოსაზრება წარმოდგენილი ფინანსური ანგარიშგების შესახებ. შესაბამისობის აუდიტის ფარგლებში კი აუდიტის სამსახურმა გამოთქვა უარყოფითი აუდიტორული მოსაზრება.
ჩატარებული აუდიტორული პროცედურების შედეგად გამოვლინდა არაფინანსური აქტივების აღრიცხვასა და განკარგვასთან დაკავშირებული მნიშვნელოვანი ხარვეზები და მოქმედ კანონმდებლობასთან შეუსაბამობის ფაქტები. აღინიშნება ნაკლოვანებები ხარჯების დროულად აღიარებასთან დაკავშირებით, რაც ფინანსური აქტივების, ვალდებულებების და, შესაბამისად, ფინანსური ანგარიშგების შემადგენელი სხვადასხვა ფორმების არამართებულად წარდგენას განაპირობებს.
ცესკო საერთოდ არ ახდენს მის სტრუქტურაში შემავალი ორგანოების ფინანსური ანგარიშგებების მონიტორინგს, არ არის შემუშავებული მკაცრად გაწერილი წესთა ერთობლიობა ნაერთი ფინანსური ანგარიშგების ფორმირებასთან დაკავშირებით. აღნიშნული კი შესაძლებელია ჩაითვალოს გამოვლენილი არსებითი და ყოვლისმომცვლელი შეცდომების გამოწვევის ერთ-ერთ ყველაზე მნიშვნელოვან მიზეზად.
გარდა ამისა, „სახელმწიფო შესყიდვების შესახებ“ საქართველოს კანონის მოთხოვნების სხვადასხვა დარღვევებს შორის აღსანიშნავია ის ფაქტი, რომ ხშირ შემთხვევაში ცესკომ ვერ წარმოადგინა საკმარისი და შესაბამისი მტკიცებულებები გამარტივებული შესყიდვის საშუალების მართებულად გამოყენებასთან დაკავშირებით.
სახელმწიფო აუდიტის სამსახურმა გამოვლენილ ხარვეზებთან დაკავშირებით გასცა რეკომენდაციები და ელოდება ცესკოს აპარატის სამოქმედო გეგმას აღნიშნული რეკომენდაციების შესრულებასთან დაკავშირებით.
