სახელმწიფო აუდიტის სამსახურმა ჩაატარა საქართველოს ფინანსთა სამინისტროს მმართველობის სფეროში შემავალი საჯარო სამართლის იურიდიული პირის - შემოსავლების სამსახურის 2012 წლის შესაბამისობის და 2013 წლის ფინანსური და შესაბამისობის აუდიტი, რომლის მიზანს წარმოადგენდა სსიპ „შემოსავლების სამსახურის „ფინანსური ანგარიშგების შესახებ მოსაზრების გამოთქმა და საქმიანობის მოქმედ კანონმდებლობასა და მარეგულირებელ ნორმებთან შესაბამისობის დადგენა.
აუდიტის პროცესში შემოსავლების სამსახურის მიერ როგორც საბიუჯეტო და სარეზერვო ფონდიდან, ასევე საკუთარი შემოსავლებიდან განხორციელებული შესყიდვების შესწავლისას გამოვლინდა დაახლოვებით 3,350.4 ათასი ლარის სამუშაოთა მოცულობების და ღირებულებების ხელოვნურად გაზრდის შედეგად ზედმეტად გადახდილ სახსრებთან და არაეკონომიურ ხარჯვასთან დაკავშირებული ფაქტები, ასევე ისეთ მომწოდებლებთან გაფორმებული ხელშეკრულებები, სადაც მოწოდებული საქონლის თვითღირებულებაზე ფასნამატი შეადგენდა არაგონივრულ ოდენობას, როგორიცაა კონკრეტულ შემთხვევაში თვითღირებულებაზე 115%-იანი ფასნამატი. აღსანიშნავია სსიპ „აღსრულების ეროვნულ ბიუროსთან გაფორმებული ხელშეკრულება, სადაც ფასის მიღებულ სარგებელთან შესაბამისობა არ იყო გამოთვლილი.
შეუსაბამობები გამოვლინდა შემოსავლების სამსახურსა და გადასახადის გადამხდელს შორის გაფორმებულ საგადასახადო კანონმდებლობით გათვალისწინებულ საგადასახადო შეთანხმებებში, რომელიც ითვალისწინებდა ბიუჯეტის წინაშე არსებული დავალიანების შემცირებას. რიგ შემთხვევებში, გადასახადის გადამხდელის მიერ საგადასახადო შეთანხმებების მიზნით შემოტანილი განცხადებები პრემიერ-მინისტრისადმი განსახილველად წარედგინებოდა დასაბუთების გარეშე, ხოლო სხვა შემთხვევებში, საგადასახადო შეთანხმებები ფორმდებოდა ისეთ ორგანიზაციებთან, რომელთა საქმიანობის სფერო არ მიეკუთვნება სტრატეგიულად მნიშვნელოვან დარგებს, რაც გაურკვეველს ხდის ბიუჯეტის წინაშე ვალდებულების შემცირების მოტივს. გამოვლინდა ვალდებულების შემცირების ისეთი შემთხვევებიც, რომელიც ფაქტობრივად წარმოადგენდა ვალდებულების პატიების ფაქტს. აღნიშნულმა გარემოებებმა გამოიწვია ბიუჯეტის შემოსავლების ნაწილის შემცირება.
აღსანიშნავია საბიუჯეტო სახსრების გაზრდის მოთხოვნების ფაქტები საკუთარი შემოსავლების გამოყენების სანაცვლოდ, ხელმძღვანელ პირებზე პრემიის სახით 2012 წელს თანამდებობრივი სარგოს 188%-278%-მდე, ხოლო 2013 წელს სარგოს 216%-227%-მდე გაცემის შემთხვევები, შემოსავლების სამსახურის თანამდებობის პირზე „საჯარო სამსახურში ინტერესთა შეუთავსებლობისა და კორუფციის შესახებ“ კანონის დარღვევით სხვა წყაროებიდან მიღებული შრომის ანაზღაურების ფაქტი და შემოსავლების სამსახურის მიერ საბანკო მომსახურების ხელშეკრულების არახელსაყრელი პირობებით გაფორმების შედეგაგ საპროცენტო სარგებლის სახით მინიმუმ 1,271.0 ათასი ლარის ოდენობით შემოსავლის დანაკარგი.
აუდიტის შედეგად გამოვლენილი საკითხების გათვალისწინებით, სახელმწიფო აუდიტის სამსახურმა გამოთქვა პირობითი მოსაზრება წარდგენილი ფინანსური ანგარიშგები შესახებ, ხოლო შესაბამისობის აუდიტის ფარგლებში უარყოფითი აუდიტორული მოსაზრება. ამასთან, მასალები შემდგომი რეაგირებისათვის გადაეგზავნა საქართველოს მთავარ პროკურატურას.
