დღეს, 14 სექტემბერს, სახელმწიფო აუდიტის სამსახურის გენერალურმა აუდიტორმა ლაშა თორდიამ საქართველოში ლატვიის რესპუბლიკის ელჩს ელიტა გაველეს და ლატვიის რესპუბლიკის კორუფციის წინააღმდეგ ბრძოლისა და პრევენციის ბიუროს (KNAB) წარმომადგენლებს უმასპინძლა. შეხვედრაზე განხილულ იქნა აუდიტის სამსახურის მიერ პოლიტიკური ფინანსების მონიტორინგის მიმართულებით გაწეული საქმიანობა.
აღსანიშნავია, რომ ევროკავშირის მხარდაჭერითა და დაფინანსებით, ერთკვირიანი ვიზიტის ფარგლებში, ლატვიელმა ექსპერტებმა დეტალურად შეისწავლეს ფინანსური მონიტორინგის სამსახურის მიერ განხორციელებული საქმიანობა. გაეცნენ სამსახურის მიერ შემუშავებულ ელექტრონული დეკლარირების პროგრამასა და ფინანსური ანგარიშგების ფორმებს, ადმინისტრაციული სამართალდარღვევის საქმეებს.
ვიზიტის ფარგლებში სამუშაო შეხვედრები გაიმართა ცენტრალურ საარჩევნო კომისიასა და თბილისისსაქალაქო სასამართლოში.
ლატვიელი კოლეგები შეხვდნენ პოლიტიკური პარტიების წარმომადგენლებს და უშუალოდ მათგან მიიღეს ინფორმაცია მონიტორინგის სამსახურის მიერ შემუშავებულ ფინანსური ანგარიშგების ფორმასა და წესებზე, კომუნიკაციის ფორმებზე, ფინანსური გამჭვირვალობის სტანდარტებსა და ტრენინგებზე, რომელიც ფინანსური ანგარიშგების ეფექტიანად განხორციელების მიზნით, რეგულარულად იმართება სახელმწიფო აუდიტის სამსახურის ორგანიზებით.
ლატვიელი ექსპერტები ასევეშეხვდნენ არასამთავრობო სექტორის წარმომადგენლებს. განხილულ იქნა წინასაარჩევნო პერიოდში არსებული პრობლემატური საკითხები, შეხვედრის მონაწილეები გაეცნენ პოლიტიკური დაფინანსების სფეროში ლატვიაში არსებულ პრაქტიკას.
ევროკავშირის დაფინანსებით დაგეგმილია ასევე სახელმწიფო აუდიტის სამსახურის თანამშრომლების ვიზიტი ლატვიაში, რომლის მიზანია ლატვიის რესპუბლიკის კორუფციის წინააღმდეგ ბრძოლისა და პრევენციის ბიუროს საქმიანობის მრავალწლიანი გამოცდილების გაცნობა.
სახელმწიფო აუდიტის სამსახური აგრძელებს მჭიდრო თანამშრომლობას პოლიტიკური დაფინანსების კანონიერებისა და გამჭვირვალობის სფეროში გამოცდილების მქონე უცხოელ კოლეგებთან და საერთაშორისო ორგანიზაციებთან.
