დღეს, 25 აპრილს, სახელმწიფო აუდიტის სამსახურსა და გერმანიის საერთაშორისო თანამშრომლობის საზოგადოების (GIZ) პროგრამას - „საჯარო ფინანსების მართვა სამხრეთ კავკასიაში", რომელიც გერმანიის ეკონომიკური თანამშრომლობისა და განვითარების ფედერალური სამინისტროს დაკვეთით ხორციელდება, ურთიერთთანამშრომლობის მემორანდუმი გაფორმდა. მემორანდუმზე ხელი სახელმწიფო აუდიტის სამსახურის გენერალურმა აუდიტორმა ლაშა თორდიამ და GIZ-ის ჯგუფის ხელმძღვანელმა, ანია გენშმა მოაწერეს.
თანამშრომლობის მემორანდუმის ძირითადი საკითხებია:
საჯარო ფინანსების მართვისა და კონტროლის სფეროში მიმდინარე რეფორმების, საქართველოში გამჭვირვალობის, ანგარიშვალდებულებისა და დემოკრატიის გაძლიერების ხელშეწყობა.
2013-2014 წლებში განსახორციელებელი ერთობლივი ღონისძიებები: საერთაშორისო სტანდარტების შესაბამისად ეფექტიანობის აუდიტის დანერგვა, ერთობლივი აუდიტების ჩატარება; ეფექტიანობის აუდიტის სფეროში სასწავლო და კვალიფიკაციის ასამაღლებელი ღონისძიებების განხორციელება; სახელმწიფო აუდიტის სამსახურის ანგარიშგების გაუმჯობესება, სახელმწიფო აუდიტის სამსახურის სამართლებრივი საფუძვლების, შიდა ორგანიზაციული სტრუქტურისა და სამუშაო პროცესების შემდგომი გაუმჯობესება, ადგილობრივი თვითმმართველი ერთეულების აუდიტის დეპარტამენტის განვითარება, სახელმწიფო აუდიტის სამსახურის საქართველოს პარლამენტთან და ფინანსთა სამინისტროსთან თანამშრომლობის გაძლიერება, რეგიონში არსებული გამოცდილების გაზიარება და სხვ.
მემორანდუმის გაფორმებას საფუძვლად უდევს საქართველოს მთავრობასა და გერმანიის ფედერაციულ რესპუბლიკას შორის 1998 წელს დადებული შეთანხმება და 2011 წელს გამართული სამთავრობო მოლაპარაკებები.
გერმანიის საერთაშორისო თანამშრომლობის საზოგადოება უკვე რამდენიმე წელია, რაც საქართველოს მხარს უჭერს პოლიტიკური, ეკონომიკური და სამართლებრივი რეფორმების განხორციელებასა და ადგილობრივი თვითმმართველობების განვითარების საქმეში.
GIZ-ის პროგრამა - „საჯარო ფინანსების მართვა სამხრეთ კავკასიაში" - 2012 წლის მაისიდან ხორციელდება და მიზნად ისახავს საჯარო ფინანსების მართვის სისტემის მიახლოვებას ევროპულ სტანდარტებთან გამჭვირვალობის, ანგარიშვალდებულებისა და ეფექტიანობის პრინციპების დამკვიდრების ხელშეწყობით. GIZ-ის პროგრამის კომპონენტებია: გარე და შიდა საფინანსო კონტროლი, შედეგზე ორიენტირებული ბიუჯეტი და საპარლამენტო საფინანსო კონტროლის გაძლიერება. GIZ-ის რეგიონალური პროგრამა - „საჯარო ფინანსების მართვა სამხრეთ კავკასიაში" - ორ ქვეყანაში, საქართველოსა და სომხეთში ხორციელდება.
