დღეს, 25 აპრილს, 14:00 საათზე, სახელმწიფო აუდიტის სამსახური და გერმანიის საერთაშორისო თანამშრომლობის საზოგადოების (GIZ) პროგრამა - „საჯარო ფინანსების მართვა სამხრეთ კავკასიაში", რომელიც გერმანიის ეკონომიკური თანამშრომლობისა და განვითარების ფედერალური სამინისტროს დაკვეთით ხორციელდება, ურთიერთთანამშრომლობის მემორანდუმს გააფორმებენ.
თანამშრომლობის მემორანდუმის ძირითადი საკითხებია:
1. საჯარო ფინანსების მართვისა და კონტროლის სფეროში მიმდინარე რეფორმების, საქართველოში გამჭვირვალობის, ანგარიშვალდებულებისა და დემოკრატიის გაძლიერების ხელშეწყობა.
2. 2013-2014 წლებში განსახორციელებელი ერთობლივი ღონისძიებები: მათ შორის, საერთაშორისო სტანდარტების შესაბამისად ეფექტიანობის აუდიტის დანერგვა, ერთობლივი აუდიტების ჩატარება, ეფექტიანობის აუდიტის სფეროში სასწავლო და კვალიფიკაციის ასამაღლებელი ღონისძიებების განხორციელება, სახელმწიფო აუდიტის სამსახურის ანგარიშგების გაუმჯობესება და სხვ.
მემორანდუმის გაფორმებას საფუძვლად უდევს საქართველოს მთავრობასა და გერმანიის ფედერაციულ რესპუბლიკას შორის 1998 წელს დადებული შეთანხმება და 2011 წელს გამართული სამთავრობო მოლაპარაკებები.
მემორანდუმზე ხელს სახელმწიფო აუდიტის სამსახურის გენერალური აუდიტორი, ლაშა თორდია და GIZ-ის ჯგუფის ხელმძღვანელი, ანია გენში მოაწერენ.
