რუსთავის იუსტიციის სახლში კონტროლის პალატის თავმჯდომარე ლევან ბეჟაშვილმა, იუსტიციის მინისტრმა, ზურაბ ადეიშვილმა და ამერიკის შეერთებული შტატების ელჩმა საქართველოში, ჯონ ბასმა ოფიციალურად გახსნეს პროგრამა „დემოკრატიული მმართველობა საქართველოში (G3)”.
პროგრამას USAID (United States Agency for International Development) ახორციელებს და მიზნად ისახავს სახელმწიფო და ადგილობრივ დონეზე ქვეყნის მმართველობის წინაშე მდგარი მრავალმხრივი სირთულეების დაძლევასა და საქართველოს სამთავრობო სტრუქტურებსა და მოქალაქეებს შორის მომსახურებისა და კომუნიკაციის ხარისხის ამაღლებას.
საქართველოს კონტროლის პალატისა და G3-ის თანამშრომლობის ფარგლებში, პროგრამის მიზანია უზრუნველყოს საჯარო ხარჯების გამჭვირვალობა. აღნიშნულ პროცესში მოქალაქეთა თანამონაწილეობის მხარდასაჭერად პროგრამა არასამთავრობო ორგანიზაციებზე გასცემს შესაბამის გრანტებს, რათა მათ განახორციელონ მონიტორინგი საჯარო სექტორის მართვაზე და თავადვე იყვნენ ჩართულნი გადაწვეტილების მიღების პროცესში.
კონტროლის პალატის თავმჯდომარემ G3-ის გახსნაზე სიტყვით გამოსვლისას აღნიშნა, რომ პროგრამის ამოცანა და საქართველოს კონტროლის პალატის სტრატეგიული მისია შინაარსობრივად ერთმანეთს ემთხვევა, რაც გამჭვირვალობის, კანონიერების, ანგარიშვალდებულებისა და ეფექტიანობის პრინციპების დანერგვაში გამოიხატება.
პროგრამის ბიუჯეტი 16 მილიონ აშშ დოლარს მოიცავს და იგი სამი წლის განმავლობაში განხორციელდება.
იხ. ტელესიუჟეტები
