აუდიტის დეპარტამენტმა აჭარის ავტონომიურ რესპუბლიკაში განახორციელა აჭარის ავტონომიური რესპუბლიკის ფინანსთა და ეკონომიკის სამინისტროს 2013 წლის ფინანსური და შესაბამისობის აუდიტი. აუდიტის შედეგად გამოვლინდა შემდეგი დარღვევა-ნაკლოვანებები:
1. აჭარის ავტონომიურ რესპუბლიკაში მყარი ნარჩენების მართვის პროექტის შესრულების მიზნით, 2013 წელს განხორციელებული რიგი ღონისძიებების მიუხედავად, კვლავ ვერ მოხერხდა პროექტის სამუშაო ვარიანტის შემუშავება და შესაბამისად, ევროპის რეკონსტრუქციისა და განვითარების ბანკიდან მიღებული სესხის აუთვისებელ ნაწილზე, 2013 წელს, ვალდებულების გადასახადის სახით გადახდილია 33,6 ათასი ლარი. პროექტის ფარგლებში მიღებული გრანტი არ არის აღრიცხული სამინისტროს ბალანსზე და არარეზიდენტების მიერ გაწეული მომსახურების ღირებულება არ არის დაბეგრილი საშემოსავლო გადასახადით.
2. ნაგავსაყრელის ადგილმდებარეობის ცვლილების გამო, არაეფექტურად გახარჯულია გრანტის სახით გამოყოფილი 1009,2 ათასი ევრო და კომპანიების მიერ გაწეულ მომსახურებაზე არასათანადო კონტროლის გამო, არასწორად განისაზღვრა გრანტის აუთვისებელი ნაშთი.
3. პრივატიზებული ქონების იპოთეკით დატვირთვის გამო, ხელშეკრულებით გათვალისწინებული ვალდებულების შეუსრულებლობის მიუხედავად, ვერ ხერხდება ხელშეკრულებების მოშლა და 5 მლნ აშშ დოლარის ღირებულების ქონების საკუთრებაში დაბრუნება. აუდიტის სამსახურის მიერ წინა წლებში გაცემული რეკომენდაციების შეუსრულებლობის გამო, 2013 წელს გაიზარდა აღნიშნული კატეგორიის ხელშეკრულებათა რიცხვი.
4. სახელმწიფო შესყიდვების შესახებ მოქმედი კანონმდებლობის შეუსრულებლობის პირობებში, არ იქნა გამოყენებული ხელშეკრულებით გათვალისწინებული უფლებამოსილება პირგასამტეხლოს დარიცხვის შესახებ, რაც ბიუჯეტისათვის 157,7 ათასი ლარის დამატებითი შემოსავლის მიღების დამაბრკოლებელ გარემოებად უნდა ჩაითვალოს.
სამინისტროს მიერ 2013 წელს გატარებული ღონისძიებების მიუხედავად, კვლავ დიდია სახელშეკრულებო პირობების შეუსრულებლობისათვის, პირგასამტეხლოს სახით დარიცხული და გადაუხდელი უნდა აღინიშნოს, რომ შესაბამისი განკარგულებების საფუძველზე, ქონების მყიდველები განთავისუფლდნენ ნასყიდობის ხელშეკრულებების პირობების დარღვევისათვის საჯარომო სანქციის სახით დარიცხული 7154,4 ათასი ლარის გადახდისაგან. აგრეთვე ფიქსირდება საკითხისადმი არაერთგვაროვანი მიდგომის ფაქტები, რადგან სანქციებისაგან გათავისუფლება განხორციელდა კონკრეტული ორგანიზაციების მიხედვით სხვადასხვა პროცენტული მაჩვენებლებით, ამასთან, რიგ შემთხვევებში, მთავრობისადმი გაგზავნილ შუამდგომლობებში, არ არის მინიშნებული დარიცხული საჯარიმო სანქციების ოდენობა, რაც საკითხისადმი სამართლიანი მიდგომის თვალსაზრისით, მნიშვნელოვან გარემოებად იქნა მიჩნეული.
5. აჭარის ავტონომიური რესპუბლიკის ქონების აღრიცხვის, ფლობისა და მართვის საქმეში არასათანადო კონტროლის შედეგად, ადგილი აქვს ქონების არამართლზომიერი გამოყენებისა და არასრული აღრიცხვის ფაქტებს. ამასთან, წარმოდგენილი დოკუმენტაციის შესაბამისად, ვერ ხერხდება 238,0 ათასი ლარის ღირებულების ქონების ფაქტობრივი მდგომარეობის დადგენა, რაც აღნიშნული ქონების მითვისების თვალსაზრისით, მნიშვნელოვან რისკ-ფაქტორად უნდა შეფასდეს.
აუდიტის შედეგად გამოვლენილ ნაკლოვანებებთან დაკავშირებით, აუდიტის დეპარტამენტის მიერ გაცემულ იქნა შესაბამისი რეკომენდაციები. ამასთან, აუდიტის მასალები შემდგომი რეაგირებისათვის გადაგზავნილ იქნა სამართალდამცავ ორგანოებზე.
იხ. ვრცლად სრული ანგარიში
