აუდიტის დეპარტამენტმა აჭარის ავტონომიურ რესპუბლიკაში განახორციელა აჭარის ავტონომიური რესპუბლიკის სოფლის მეურნეობის სამინისტროს 2013 წლის ფინანსური და შესაბამისობის აუდიტი, აუდიტის შედეგად გამოვლინდა შემდეგი დარღვევა-ნაკლოვანებები:
1. აჭარის ავტონომიური რესპუბლიკის სოფლის მეურნეობის სამინისტროში სასოფლო-სამეურნეო გაერთიანებების სარეკლამო მოდელების ჩამოყალიბება და შემდგომი დანერგვის ორგანიზების ქვეპროგრამა, რომლის ბიუჯეტიც 79,0 ათასი ლარით განისაზღვრა, მოქმედი კანონდებლობის დარღვევით განხორციელდა და მიღებული შედეგები არ შეესაბამება პროგრამით დასახულ მიზნებს. ამასთან, პროექტის ფარგლებში გახარჯული თანხა, საბიუჯეტო სახსრების რაციონალური გამოყენების თვალსაზრისით, მნიშვნელოვან რისკ-ფაქტორად უნდა შეფასდეს.
2. აჭარის ავტონომიური რესპუბლიკის სოფლის მეურნეობის სამინისტროს მიერ მექანიზაციის ტექნიკური საშუალებებით ფერმერთა უზრუნველყოფის ხელშეწყობის პროგრამის 2012 წლის პრიორიტეტების არასწორი განსაზღვრის შედეგად, 2013 წლის 31 დეკემბრის მდგომარეობით, სამინისტროს ნაშთად ერიცხება შესყიდული 23 ერთეული 10,1 ათასი ლარის ღირებულების ზურგსაკიდი შემასხურებელი აპარატი. ამასთან, აღნიშნული აპარატები ნაცვლად შემდგომი რეალიზაციისათვის შეძენილი საქონელის ანგარიშისა, აღრიცხულია ძირითადი აქტივების ანგარიშზე.
3. ა(ა)იპ „აგროსერვის ცენტრში“, აგროტექნოლოგიური ნორმების დაუცველობის შედეგად ადგილი აქვს სხვადასხვა ჯიშის ნერგების დიდი რაოდენობით გახმობის ფაქტებს. წარმოდგენილი მასალების შესაბამისად, გამხმარია 41832 ძირი - 38,6 ათასი ლარის ღირებულების ნერგი.
4. ა(ა)იპ „აგროსერვის ცენტრში“ გამოვლინდა ელექტრონული ტენდერის ჩატარებისას საკვალიფიკაციო მონაცემების არასამართლიანად განსაზღვრის ფაქტები. ამასთან, სატენდერო კომისიის მუშაობაში ადგილი აქვს საკითხებისადმი არაერთგვაროვანი მიდგომისა და სამშენებლო სამუშაოთა ხარჯთაღრიცხვაში ფართო მასშტაბის ცვლილებების ფაქტებს, რაც შესყიდვების არასათანადოდ დაგეგმვა-წარმართვაზე მიუთითებს.
5. აჭარის ავტონომიური რესპუბლიკის სოფლის მეურნეობის სამინისტროსა და მისდამი დაქვემდებარებულ ა(ა)იპ „აგროსერვის ცენტრში“ სახელმწიფო შესყიდვების წარმოებისას სატენდერო დოკუმენტაციით განსაზღვრულ მოთხოვნებთან არაერთგვაროვანი მიდგომის შედეგად, ადგილი აქვს კონკურენციის შეზღუდვის ფაქტებს.
აუდიტის შედეგად გამოვლენილ დარღვევა-ნაკლოვანებებზე შედგა შესაბამისი რეკომენდაცია, რომელიც გადაგზავნილ იქნა აუდიტის ობიექტისთვის. ასევე, მასალები გადაგზავნილ იქნა .აჭარის ავტონომიური რესპუბლიკის პროკურატურაში.
იხ. ვრცლად სრული ანგარიში
