აუდიტის დეპარტამენტმა აჭარის ავტონომიურ რესპუბლიკაში განახორციელა აჭარის ავტონომიური რესპუბლიკის მთავრობის აპარატის 2013 წლის ფინანსური და შესაბამისობის აუდიტი. აუდიტის შედეგად გამოვლინდა შემდეგი დარღვევა- ნაკლოვანებები:
- მთავრობის აპარატს რაოდენობრივად ერიცხება 2005 წელს გამოშვებული VAZ 21214 ტიპის ავტომანქანა, რომელსაც საბალანსო ღირებულება არ გააჩნია. აუდიტის პერიოდში აღნიშნულ სატრანსპორტო საშუალებაზე მიმდინარე შეკეთებისთვის გაწეულია 2 344 ლარის ხარჯი, გაცემული და ჩამოწერილია 2041 ლარის ღირებულების 1053 ლიტრი საწვავი. შესაბამისად, უნდა მომხდარიყო ავტოსატრანსპორტო საშუალების შეფასება/ფაქტობრივი ღირებულების დადგენა და საბალანსო მონაცემებში ასახვა, რაც არ არის განხორციელებული.
- მთავრობის აპარატში დასაქმებული შტატგარეშე მოსამსახურებიდან 14 პირთან გაფორმებულ ხელშეკრულებებში არ არის მითითებული და გამიჯნული შესასრულებელი სამუშაოს დასახელება, ხოლო მათ მიერ არ არის წარმოდგენილი ხელშეკრულების პირობების შესაბამისად გაწეული საქმიანობის შესახებ წერილობითი დადასტურება. ამასთან, შტატგარეშე მოსამსახურეებიდან 4 მოსამსახურე დასაქმებულია 2009 წლიდან, 5 - 2012 წლიდან და 8 - 2013 წლიდან. „საჯარო სამსახურის შესახებ საქართველოს კანონის“ მე-8 მუხლის თანახმად, შტატგარეშე მოსამსახურე არის პირი, რომელიც დანიშვნით ან შრომითი ხელშეკრულებით გარკვეული ვადით მიიღება სამსახურში არამუდმივ ამოცანათა შესასრულებლად. ამდენად, აღნიშნულ პირობებში თანამშრომელთა შტატგარეშე მოსამსახურედ დასაქმებით დარღვეულია მოქმედი კანონმდებლობის მოთხოვნები, აღნიშნული ნაკლოვანება ასახულია წინა პერიოდის აუდიტის შედეგებშიც.
- აუდიტის პერიოდში მთავრობის აპარატის საკუთრებაში არსებული ფასეულობებიდან 165 დასახელების ინვენტარი არ არის შეფასებული და შემოსავალში ასახული.
- აუდიტის შედეგად გამოვლენილ ნაკლოვანებებთან დაკავშირებით, აუდიტის დეპარტამენტის მიერ გაცემული იქნა შესაბამისი რეკომენდაციები, რომელთა მნიშვნელოვანი ნაწილი გათვალისწინებულია, ხოლო ნაწილი შესრულების პროცესშია.
იხ. ვრცლად: სრული ანგარიში
