აუდიტის დეპარტამენტმა აჭარის ავტონომიურ რესპუბლიკაში განახორციელა აჭარის ავტონომიური რესპუბლიკის განათლების, კულტურისა და სპორტის სამინისტროს 2013 წლის ფინანსური და შესაბამისობის აუდიტი. აუდიტის შედეგად გამოვლინდა რიგი დარღვევა-ნაკლოვანებები, კერძოდ:
1. სპორტისა და ახალგაზრდობის საქმეთა დეპარტამენტმა, სხვადასხვა კლასიფიკატორის კოდის მქონე სპორტული საქონლისა და ველოსიპედების შესყიდვის სავარაუდო ღირებულება, ბაზრის სათანადო შესწავლის გარეშე, განსაზღვრა 487 000 ლარით. ტენდერში მონაწილეობდა მხოლოდ ერთი პრეტენდენტი, - ტენდერის გამოცხადების დღეს დაფუძნებული შპს „მ.ნ.კ“. მიწოდებულ საქონელში დეპარტამენტის მიერ გადახდილია 487 000 ლარი, ხოლო მიმწოდებელი კომპანიის წარმოდგენილი შესყიდვის დოკუმენტაციით მიწოდებული საქონლის საბაზრო ღირებულება შეადგენს 330 000 ლარს. აღინიშნა შეუსაბამოდ მაღალი ფასნამატები. მაგ.: დეპარტამენტისთვის მიწოდებული 8 ერთეული მკლავჭიდის მაგიდის საცალო საბაზრო ფასი შეადგენს სულ 3600 ლარს, თუმცა დეპარტამენტმა ერთ მაგიდაში გადაიხადა 2 500 ლარი (სულ 8 ერთეულ მკლავჭიდის მაგიდაში გადახდილია 20 000 ლარი, ფასნამატი შეადგენს 455.6%-ს), მიწოდებული ფეხბურთის ბურთის საცალო საბაზრო ფასი შეადგენს 25 ლარს, თუმცა დეპარტამენტმა ერთ ბურთში გადაიხადა 100 ლარი (სულ 100 ერთეულ ფეხბურთის ბურთში გადახდილია 10 000 ლარი, ფასნამატი შეადგენს 300%-ს). ამდენად, დეპარტამენტის მხრიდან, ბაზარზე არსებულ ფასებთან შედარებით 157 000 ლარით მეტი თანხის გადახდა, საბიუჯეტო სახსრების არაეკონომიურ და არაეფექტიან ხარჯვაზე მიუთითებს.
იხ. ვრცლად სრული ანგარიში
