საქართველოს კონტროლის პალატის დელეგაცია, თავმჯდომარის ლევან ბეჟაშვილის ხელმძღვანელობით 27-30 იანვარს ოფიციალური ვიზიტით იმყოფებოდა მოლდავეთის აუდიტორულ სასამართლოში.
2005 წელს საქართველოს კონტროლის პალატასა და მოლდავეთის აუდიტორულ სასამართლოს შორის გაფორმებულია ურთიერთთანამშრომლობის შეთანხმება, რომლის ფარგლებშიც შედგა ვიზიტი.
მოლდაველ კოლეგებთან წარმატებული თანამშრომლობის ხანგრძლივი გამოცდილება აქვს შვედეთის აუდიტის ოფისს, რომელიც ამავე დროს არის საქართველოს კონტროლის პალატის პარტნიორი რეფორმის, ახალი სტანდარტებისა თუ რეგულაციების შემუშავება-დანერგვის საქმეში.მოლდავეთის აუდიტორული სასამართლოს მიღწევებიდან აღინიშნა, რომ დაგეგმვის პროცესისა და აუდიტის ახალი მეთოდოლოგიით ჩატარების კვალობაზე შემცირდა წლის განმავლობაში ჩატარებული აუდიტების რაოდენობა (2009 წელს 60-ს არ აღემატებოდა), მაგრამ იზრდება ხარისხი – აუდიტორული სასამართლო ძველი მაკონტროლებელი ფუნქციის მქონე უწყებიდან გარდაიქმნა სახელმწიფო აუდიტის ფუნქციის მქონე ინსტიტუციად. ვიზიტისას შედგა შეხვედრა მოლდავეთის პარლამენტის საფინანსო, საბიუჯეტო და ეკონომიკის კომიტეტის თავმჯდომარესთან.
