დღეს, 11 ივლისს, სახელმწიფო აუდიტის სამსახურში ახალი ვებგვერდის პრეზენტაცია გაიმართა. აღნიშნულთან დაკავშირებით, ინფორმაცია ჟურნალისტებს ადმინისტრაციის უფროსმა, არჩილ კიკვაძემ მიაწოდა.
განახლებული ვებგვერდის მეშვეობით ნებისმიერი მოქალაქე შეძლებს მაქსიმალურად მოკლე დროში - ოპერატიულად გაეცნოს სახელმწიფო აუდიტის სამსახურის საქმიანობის მისთვის საინტერესო მიმართულებებს, მიიღოს ნებისმიერი სახის ინფორმაცია ჩვენი სამსახურის შესახებ და გამოხატოს თავისი პოზიცია და გამოთქვას მოსაზრებები.
- განახლებული ვებგვერდი დაყოფილია მიზნობრივი ჯგუფების - ინტერესების მიხედვით, კერძოდ, ცალკე ჯგუფად არის გამოყოფილი აუდიტი, სადაც იგულისხმება აუდიტის სამსახურის მიერ ჩატარებული აუდიტორული საქმიანობები.
- საჯარო ინფორმაციის მიღების მსურველს დროის დაზოგვის მიზნით, შეეძლება შევიდეს სახელმწიფო აუდიტის ვებგვერდზე და მონახოს მისთვის სასურველი ინფორმაცია, რაც დაუზოგავს დროს, ენერგიას და ხშირ შემთხვევაში - ფინანსებსაც.
- პოლიტიკური პარტიების ფინანსური საქმიანობის მონიტორინგის კუთხითაც მნიშვნელოვნად გამარტივებულია ინფორმაციის მოძიება. ცალკე მიზნობრივ ჯგუფად არის გამოყოფილი აღნიშნული საკითხი და ყველა მნიშვნელოვანი ინფორმაცია მარტივად დაჯგუფებულია აღნიშნულ ბლოკში.
- განახლებული ვებგვერდი მაქსიმალურად ორიენტირებულია მომხმარებელზე, არის ადვილად მისახვედრი, მარტივი აგებულების, მინიმალური რესურსების მქონე კომპიუტერის შესაძლებლობებზე გათვლილი, რაც მნიშვნელოვნად გაუადვილებს მომხმარებელს ვებგვერდით სარგებლობას.
- ვებგვერდი ადაპტირებულია სოციალურ ქსელებთან და განსაკუთრებით მნიშვნელოვანია მისი ერთ-ერთი მთავარი სიახლე: ვებგვერდს გააჩნია მთელი რიგი ფუნქციები უნარშეზღუდული მომხმარებლისთვის.
ვებგვერდი სისტემატურად განახლდება, შეივსება ახალი ინფორმაციით, რაც საბოლოოდ სახელმწიფო აუდიტის საქმიანობის მეტად გამჭვირვალობასა და ხელმისაწვდომობას შეუწყობს ხელს.
იხ. ტელესიუჟეტი
