Header

Header Top

Standard Version

სტანდარტული ვერსია

Language Switcher

Quick Menu

Site Settings - Easy Read and Text Size

Content

Page Content

  • ტექსტის ზომა:
  • A
  • A
  • A

აუდიტი

ხელვაჩაურის მუნიციპალიტეტის 2016 წლის ფინანსური აუდიტის ანგარიში

გამოქვეყნების თარიღი: 26:06:2017

დეპარტამენტი: აუდიტის დეპარტამენტი აჭარის ავტონომიურ რესპუბლიკაში

ტიპი: ფინანსური აუდიტი

აუდიტის დეპარტამენტმა აჭარის ავტონომიურ რესპუბლიკაში განახორციელა ხელვაჩაურის მუნიციპალიტეტის 2016 წლის ფინანსური აუდიტი. აუდიტის შედეგად გამოვლინდა შემდეგი დარღვევა-ნაკლოვანებები:

  • ხელვაჩაურის მუნიციპალიტეტის 2016 წლის ბალანსის მონაცემი წმინდა ღირებულების შესახებ, 2016 წლის 1 იანვრის მდგომარეობით, სათანადო საფუძვლის გარეშე, არანაკლებ 261.7 ათასი ლარით არის შემცირებული;
  • საბუღალტრო მონაცემების გათვალისწინებით, ხელვაჩაურის მუნიციპალიტეტს აქვს მოთხოვნები აქტივების მიღებაზე წინასწარი გადახდებით 198.7 ათასი ლარის ოდენობით და მოთხოვნები დარიცხული ჯარიმებით, სანქციებით და საკუთრებასთან დაკავშირებული სხვა შემოსავლებით 256.7 ათასი ლარის ოდენობით, რაც დადგენილი წესით არ არის ასახული ხელვაჩაურის მუნიციპალიტეტის 2016 წლის 31 დეკემბრის მდგომარეობით წარდგენილ ბალანსში;
  • ხელვაჩაურის მუნიციპალიტეტის 2016 წლის ბალანსის თანახმად, სხვა დანარჩენი საქონელი და მომსახურების საკასო ხარჯი შეადგენს 513.4 ათას ლარს, ხოლო ფაქტობრივი ხარჯი -1,649.8 ათას ლარს. სხვაობა საკასო და ფაქტობრივ ხარჯს შორის წარმოდგენილი საბუღალტრო დოკუმენტაციით არ დასტურდება. აუდიტის ობიექტის განმარტებით, სხვაობა გამოწვეულია ტექნიკური ხარვეზის გამო;
  • საინვენტარიზაციო კომისიის მიერ, ხელვაჩაურის მუნიციპალიტეტის გამგეობის/ საკრებულოს ბალანსზე რიცხული ქონებიდან განხორციელებული იქნა მხოლოდ ადმინისტრაციული დანიშნულების ქონების ინვენტარიზაცია, რითაც დარღვეული იქნა საქართველოს ფინანსთა მინისტრის 2010 წლის 23 ივლისის N605 ბრძანებით დამტკიცებული „საბიუჯეტო ორგანიზაციებში ქონების, მოთხოვნებისა და ვალდებულებების ინვენტარიზაციის ჩატარების წესის“ მე-3 მუხლის პირველი პუნქტი და მე-4 მუხლი;
  • სამშენებლო სამუშაოების სახელმწიფო შესყიდვების პროცესში ფიქსირდება, მიმწოდებლების მხრიდან სახელშეკრულებო ვალდებულებების დროულად შეუსრულებლობის დროს, პირგასამტეხლოს არასრულად დარიცხვის შემთხვევები.

აუდიტის შედეგად გამოვლენილ ნაკლოვანებებთან დაკავშირებით, აუდიტის დეპარტამენტის მიერ გაცემული იქნა შესაბამისი რეკომენდაციები. 

სსიპ - სასწავლო უნივერსიტეტი - ბათუმის სახელმწიფო საზღვაო აკადემიის 2016 წლის შესაბამისობის აუდიტის ანგარიში

გამოქვეყნების თარიღი: 21:06:2017

დეპარტამენტი: აუდიტის დეპარტამენტი აჭარის ავტონომიურ რესპუბლიკაში

ტიპი: შესაბამისობის აუდიტი

აუდიტის დეპარტამენტმა აჭარის ავტონომიურ რესპუბლიკაში განახორციელა სსიპ - სასწავლო უნივერსიტეტი - ბათუმის სახელმწიფო საზღვაო აკადემიის 2016 წლის შესაბამისობის აუდიტი. აუდიტის შედეგად გამოვლინდა შემდეგი გარემოებები:

  • საზღვაო აკადემიაში დადგენილი წესის შესაბამისად სათანადოდ არ ხორციელდება აკადემიური პერსონალის და მოწვეული მასწავლებლის მიერ სამსახურში გამოუცხადებლობის შესახებ შეტყობინების, გაცდენილი სალექციო საათების აღდგენის და ჩანაცვლების ეფექტური ადმინისტრირება;
  • საზღვაო აკადემიას, მონიტორების სახელმწიფო შესყიდვის განხორციელებამდე, არ მიუღია საქართველოს მთავრობის თანხმობა, რითაც შეუსრულებელია საქართველოს მთავრობის 2016 წლის 9 ივნისის N252 დადგენილების მოთხოვნები;
  • საზღვაო აკადემიაში არ არის ჩატარებული ქონების, მოთხოვნებისა და ვალდებულებების ინვენტარიზაცია. ასევე მატერიალურად პასუხისმგებელ პირებთან, დადგენილი წესით არ არის გაფორმებული წერილობითი ხელშეკრულება, სრული მატერიალური პასუხისმგებლობის შესახებ;
  • საზღვაო აკადემიის მიერ, მოიჯარის მხრიდან საიჯარო ხელშეკრულების პირობების დარღვევისას, არ იქნა მიღებული ეფექტური და დროული გადაწყვეტილება, ქონების დაბრუნების და მისი შემდგომი განკარგვის შესახებ.

აუდიტის შედეგად გამოვლენილ ნაკლოვანებებთან დაკავშირებით, აუდიტის დეპარტამენტის მიერ გაცემული იქნა შესაბამისი რეკომენდაციები.

დმანისის მუნიციპალიტეტის 2015-2016 წლების საფინანსო-ეკონომიკური საქმიანობის შესაბამისობის აუდიტის ანგარიში

გამოქვეყნების თარიღი: 19:06:2017

დეპარტამენტი: ადგილობრივი თვითმმართველი ერთეულების ბიუჯეტების აუდიტის დეპარტამენტი

ტიპი: შესაბამისობის აუდიტი

  • 2015-2016 წლებში დმანისის მუნიციპალიტეტის მიერ იჯარის ფორმით სულ გაცემულია 69 ობიექტი. მათ შორის, 25 შემთხვევაში გაცემულია აუქციონით, ხოლო 44 შემთხვევაში - პირდაპირი განკარგვით. აუქციონის ფორმით გაცემული მიწების ჯამური საწყისი ფასი იყო 37.0 ათასი ლარი, ხოლო ვაჭრობის შედეგად ჯამურმა საბოლოო ღირებულებამ შეადგინა 119.5 ათასი ლარი. მიუხედავად ამისა, მუნიციპალიტეტის მიერ სააუდიტე პერიოდში იჯარით განკარგული ობიექტების რაოდენობის 63%, გაცემულია პირდაპირი განკარგვის წესით;
  • სოფელ გომარეთში, პირდაპირი განკარგვის წესით, იჯარით გაცემულია 5 ობიექტი, სულ 43.3 ჰა. აუდიტორის შეფასებით, აღნიშნული ობიექტები წარმოადგენს სასოფლო-სამეურნეო დანიშნულების მიწას (საძოვარს). ფართების ადგილზე დათვალიერების შედეგად აღმოჩნდა, რომ მიწის ნაკვეთები რეალურად წარმოადგენს ტბებს, რომლებსაც მოიჯარეები იყენებენ კომერციული მიზნებისთვის;
  • 2016 წლის 31 დეკემბრის მდგომარეობით, საიჯარო ქირის სახით მიუღებელმა შემოსავალმა 71.0 ათასი ლარი შეადგინა. მუნიციპალიტეტის მიერ მოიჯარეებზე იჯარის ქირის გადაუხდელობისთვის არ არის დარიცხული ხელშეკრულებით გათვალისწინებული საურავი;
  • 2015-2016 წლებში დმანისის მუნიციპალიტეტში შესრულებულ საგზაო სამუშაოებზე, მიმწოდებლების მიერ წარმოდგენილია ექსპერტიზის დასკვნები, თუმცა მათი ანალიზით გაირკვა, რომ ექსპერტების მიერ ჩატარებული კვლევები მოიცავს მხოლოდ შესრულებული სამუშაოების მოცულობით ნაწილს. შედეგად, მუნიციპალიტეტს არ გააჩნია ინფორმაცია ასფალტბეტონის საფარის ხარისხის სტანდარტებთან შესაბამისობის შესახებ;
  • 2016 წელს დმანისის მუნიციპალიტეტმა შეისყიდა ქუჩების და ეზოების მოასფალტების სამუშაოები. შესრულებული სამუშაოს აქტების მიხედვით, განხორციელდა გზებისა და ეზოების მოწყობა 3 435 კუბ.მ ინერტული მასალების გამოყენებით, ღირებულებით 135.0 ათასი ლარი. აუდიტის ჯგუფმა შემსყიდველის მეშვეობით მიმწოდებლისგან მოითხოვა ინერტული მასალების შესყიდვის დოკუმენტები. წარმოდგენილი დოკუმენტების მიხედვით, გზებისა და ეზოების მოსაწყობად შეტანილია მხოლოდ 240 კუბ.მ ინერტული მასალები;
  • 2016 წელს მუნიციპალიტეტმა შეისყიდა სოფლებში სასაფლაოებთან მისასვლელი გზების მოასფალტების სამუშაოები. შესრულებული სამუშაოს აქტების მიხედვით, სოფლებში განხორციელებულია ასფალტბეტონის საფუძვლის მოწყობა 2786 კუბ.მინერტული მასალისგამოყენებით, ღირებულებით 161.7 ათასი ლარი. მიმწოდებლის მიერ წარმოდგენილი ინერტული მასალების შესყიდვისა და ტრანსპორტირების დოკუმენტების მიხედვით, სოფლებში შეტანილია მხოლოდ 1355 კუბ.მ ინერტული მასალები.
  • 2015 წელს მუნიციპალიტეტმა განახორციელა ქ. დმანისში წმ. ნინოს ქუჩაზე არსებული საფეხბურთო მინისტადიონის სარემონტო სამუშაოები, ღირებულებით - 28.8 ათასი ლარი. სამუშაოების საგარანტიო ვადად განისაზღვრა 2 წელი. მინისტადიონის ადგილზე დათვალიერებით გაირკვა, რომ სამუშაოები დაზიანებულია. მიუხედავად ხელშეკრულებით განსაზღვრული უფლებისა, მუნიციპალიტეტს საგარანტიო მოთხოვნის შესაძლებლობით არ უსარგებლია.
  • 2015 წელს სოფელ მაშავერაში, შესრულებული სამუშაოს აქტების მიხედვით, მოწყობილია ბეტონის სანიაღვრე არხი 220 გრძ.მ და კანალიზაციის მილი - 900 გრძ.მ, საერთო ღირებულებით - 22.7 ათასი ლარი. სამუშაოების დათვალიერების შედეგად ფაქტობრივად აღმოჩნდა, რომ შესრულებულია 151 გრძ. მ ბეტონის სანიაღვრე არხი, ხოლო კანალიზაციის მილი - 876 გრძ.მ-ს შეადგენს. მიუხედავად შეუსრულებელი სამუშაოებისა, მიმწოდებელს თანხა აუნაზღაურდა სრულად;
  • 2016 წელს სოფელ ჩათახში სპორტული ოთახის მოწყობაზე გადახდილია 3.3 ათასი ლარი. შესრულების აქტის მიხედვით, სამუშაოები დამთავრებულია, თუმცა დათვალიერების შედეგად გაირკვა, რომ სამუშაოები დაუსრულებელია;
  • 2015-2016 წლებში დმანისის მუნიციპალიტეტის მიერ სამშენებლო-სარემონტო სამუშაოების განხორციელების მიზნით, გამარტივებული შესყიდვის ფორმით გაფორმებულია 109 ხელშეკრულება, საერთო ღირებულებით - 712.0 ათასი ლარი. მუნიციპალიტეტის მიერ ფაქტობრივი ხარჯის დამადასტურებელი დოკუმენტაცია ვერ იქნა წარმოდგენილი;
  • 2015 წელს მუნიციპალიტეტმა სარიტუალო დარბაზის მოსაწყობად, თეიმურაზ თეთრაძისგან, რომელსაც უკავია მუნიციპალიტეტის გამგეობის ინფრასტრუქტურისა და ეკონომიკური განვითარების სამსახურის უფროსის თანამდებობა, 15.0 ათას ლარად შეიძინა სოფელ ამამლოში მდებარე 64.4 კვ.მ ფართის შენობა-ნაგებობა. აღნიშნული ქმედებით, დაირღვა „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონის მოთხოვნები;
  • 2015 წელს დმანისის მუნიციპალიტეტმა სახელმწიფო შესყიდვების კანონმდებლობის მოთხოვნათა გვერდის ავლით, შპს „ხვამლი 777“-თან გაფორმებული ხელშეკრულების საფუძველზე, განახორციელა საექსპერტო მომსახურების შესყიდვა, ღირებულებით 11.0 ათასი ლარი;
  • მუნიციპალიტეტის საკრებულოს წევრებზე, ხარჯების დამადასტურებელი დოკუმენტების წარმოდგენის გარეშე, საანგარიშო პერიოდში დახარჯულია სულ 197.1 ათასი ლარი;
  • დმანისის მუნიციპალიტეტის მიერ ა(ა)იპ „ქვემო ქართლის რეგიონალურ განვითარების სააგენტოს“ ანგარიშზე 2015-2016 წლებში გადარიცხულია 52.0 ათასი ლარი. მუნიციპალიტეტმა ვერ წარმოადგინა ინფორმაცია იმის შესახებ, თუ რა აქტივობები განახორციელა სააგენტომ და შედეგად რა სარგებელი მიიღო თვითმმართველობამ.

მიმაგრებული ფაილები

ზესტაფონის მუნიციპალიტეტის 2014-2015 წლების საფინანსო-ეკონომიკური საქმიანობის შესაბამისობის აუდიტი

გამოქვეყნების თარიღი: 19:06:2017

დეპარტამენტი: ადგილობრივი თვითმმართველი ერთეულების ბიუჯეტების აუდიტის დეპარტამენტი

ტიპი: ეფექტიანობის აუდიტი

სახელმწიფო აუდიტის სამსახურმა ჩაატარა ზესტაფონის მუნიციპალიტეტის 2014-2015 წლების საფინანსო-ეკონომიკური საქმიანობის შესაბამისობის აუდიტი. აუდიტის შედეგად გამოვლინდა შემდეგი დარღვევა-ნაკლოვანებები:

  • ზესტაფონის მუნიციპალიტეტში, სოფელ ფუთის ყოფილი სკოლის შენობა-ნაგებობების გასაყიდი (საბაზრო) ფასი, აუდიტორული დასკვნის მიხედვით, შეადგენდა 66.2 ათას ლარს. მუნიციპალიტეტმა აუქციონზე ქონების საწყისი საპრივატიზებო ფასი განსაზღვრა 6.2 ათასი ლარით. საბოლოოდ, 2015 წელს შენობა გაიყიდა 52.1 ათას ლარად, აუდიტორის მიერ დადგენილ საწყის საპრივატიზებო საფასურთან შედარებით 14.1 ათასი ლარით უფრო ნაკლებად;
  • 2014 წელს ზესტაფონის მუნიციპალიტეტმა ხელშეკრულება გააფორმა შპს „ტობესთან“ სოფელ ტაბაკინში ბეტონის გზის მოწყობის სამუშაოებზე, საერთო ღირებულებით - 930.2 ათასი ლარი. სამუშაოების მიმდინარეობისას ზედამხედველმა წერილობით 4-ჯერ მიმართა მუნიციპალიტეტს, რომ ვიზუალური დათვალიერებით, დაგებული ბეტონის ხარისხი არ იყო დამაკმაყოფილებელი და საჭიროებდა შემოწმებას. შემსყიდველმა არ გაითვალისწინა ზედამხედველის რეკომენდაცია და მიმწოდებელს შუალედური შესრულების საფუძველზე სულ აუნაზღაურა 721.8 ათასი ლარი, მათ შორის, ზედამხედველის მიმართვის შემდეგ - 471.8 ათასი ლარი. სამუშაოების დასრულების შემდეგ ლევან სამხარაულის სახელობის სასამართლო ექსპერტიზის ეროვნულმა ბიურომ ჩაატარა რეაბილიტირებული გზის ექსპერტიზა. დასკვნის მიხედვით, ხელშეკრულების პირობების შესაბამისად, შესრულებულია 374.8 ათასი ლარის სამუშაო, მაშინ როდესაც გამგეობის მიერ ანაზღაურებულია 721.8 ათასი ლარი. შედეგად მუნიციპალიტეტის მიერ 347 ათასი ლარი გადახდილია ისეთ სამუშაოებში, რომელთა ხარისხიც არ აკმაყოფილებს ხელშეკრულებით განსაზღვრულ მოთხოვნებს;
  • 2014 წელს ტაბაკინის გზის სარეაბილიტაციო სამუშაოებზე მიმწოდებელმა მუნიციპალიტეტს წარუდგინა 46.5 ათასი ლარის ღირებულების ხელშეკრულების შესრულების უზრუნველყოფის გარანტია. მიუხედავად იმისა, რომ მიმწოდებელმა ვერ მოახერხა სამუშაოების ჩაბარება ხელშეკრულებით განსაზღვრული პირობების შესაბამისად, მუნიციპალიტეტმა არ მოითხოვა ხელშეკრულების უზრუნველყოფის გარანტიით გათვალისწინებული თანხის ანაზღაურება და შესაბამისად, დაკარგა 46.5 ათასი ლარის მიღების შესაძლებლობა;
  • 2015 წელს სოფელ ზოვრეთის გზის კაპიტალურ შეკეთებაზე დაიხარჯა 189.7 ათასი ლარი. გზის ნაწილი საგარანტიო პერიოდში გამოვიდა მწყობრიდან, რომელიც მიმწოდებელმა შეაკეთა ფრაგმენტული ჩაკერების გზით. აუდიტის ჯგუფმა სამუშაოები ადგილზე დაათვალიერა, რის შედეგადაც გამოვლინდა, რომ დაზიანებული იყო როგორც თავდაპირველად მოწყობილი გზის ასფალტობეტონის საფარის ნაწილი, ასევე საგარანტიო ვადაში მოწყობილი ფრანგმეტული ჩაკერებები. შესაბამისად, ზოვრეთის გზის კაპიტალური შეკეთების სამუშაოები, რაშიც გადახდილია 189.7 ათასი ლარი, შესრულებულია უხარისხოდ;
  • 2015 წელს სოფელ სასახლეში, ფუთში, ქვედა და ზედა საქარაში, ასევე ქალაქ ზესტაფონში ანჯაფარიძის ქუჩაზე გზის კაპიტალური შეკეთების სამუშაოების დათვალიერების შედეგად გამოვლინდა, რომ 724.8 ათასი ლარის სამუშაოები შესრულებულია უხარისხოდ და გზის საფარი დაზიანებულია. მიუხედავად იმისა, რომ ყველა ობიექტს გააჩნდა მოქმედი საგარანტიო ვადა, მუნიციპალიტეტს არ მიუმართავს მიმწოდებლებისთვის არსებული ხარვეზების აღმოფხვრის მიზნით.
  • 2015 წელს ზესტაფონის №5 სკოლამდელი აღზრდის დაწესებულების სარემონტო სამუშაოების განხორციელებაზე, ორი ხელშეკრულების ფარგლებში, დაიხარჯა 123.6 ათასი ლარი. აუდიტის ჯგუფის მიერ ობიექტის დათვალიერების შედეგად გამოვლინდა, რომ მიუხედავად ექსპერტის დადებითი შეფასებისა, სამუშაოების ნაწილი შესრულებულია უხარისხოდ და გამოსულია მწყობრიდან. ამასთანავე, სამუშაოების საგარანტიო ვადა გასული არ იყო, თუმცა გამგეობას არ მიუმართავს მიმწოდებლებისათვის დაზიანებების აღმოფხვრის მიზნით;
  • 2015 წელს განხორციელდა ქ. ზესტაფონის №2 სკოლამდელი აღზრდის დაწესებულების სარეაბილიტაციო სამუშაოები, ღირებულებით 69 ათასი ლარი. წარმოდგენილი დოკუმენტაციის შესწავლით ირკვევა, რომ ბაღის სახურავი რეაბილიტაციიდან 4 თვეში გამოვიდა მწყობრიდან, რომელიც მიმწოდებელმა საგარანტიო ვადაში რამდენჯერმე შეაკეთა, თუმცა პრობლემის აღმოფხვრა მაინც ვერ მოხერხდა. აუდიტის ჯგუფის მიერ სამუშაოების დათვალიერების შედეგად აღმოჩნდა, რომ გადახურვა შესრულებულია უხარისხოდ და წვიმიან ამინდში ნალექი აღწევს საბავშვო ოთახებში, ასევე დაზიანებულია ხელშეკრულების ფარგლებში მოწყობილი სველი წერტილები. შესაბამისად, მუნიციპალიტეტის მიერ 69 ათასი ლარი გადახდილია სარეაბილიტაციო სამუშაოებში, რომლებიც შესრულებულია უხარისხოდ;
  • 2015 წელს მუნიციპალიტეტმა ხელშეკრულება გააფორმა შპს „მშენებელი 99“-თან, რომელიც ითვალისწინებდა მუნიციპალიტეტის 11 ადმინისტრაციული ერთეულისთვის 172.4 ათასი ლარის ღირებულების, 1077.5 კუბ.მმზა ბეტონის მიწოდებას. წარმოდგენილი დოკუმენტების მიხედვით, მიმწოდებელს 87.8 ათასი ლარის ღირებულების 548.5 კუბ.მ ბეტონზე საერთოდ არ წარმოუდგენია ხელშეკრულებით განსაზღვრული ექსპერტიზის დასკვნები. მიუხედავად აღნიშნულისა, გამგეობას სრულად აქვს ანაზღაურებული მიწოდებული მზა ბეტონის ღირებულება;
  • 2014-2015 წლებში ზესტაფონის მუნიციპალიტეტმა შეისყიდა მრავალსართულიანი საცხოვრებელი სახლების სახურავის მასალები, საერთო ღირებულებით 148.9 ათასი ლარი. სამუშაოების ადგილზე დათვალიერების შედეგად აღმოჩნდა, რომ 10 საცხოვრებელ კორპუსში, სადაც გადაცემული მასალების საერთო ღირებულება შეადგენს 53.5 ათას ლარს, სამუშაოები შესრულებულია უხარისხოდ და მოსული ნალექი აღწევს საცხოვრებელ სახლებში. სრულად დასაწყობებულია 10.8 ათასი ლარის ღირებულების მასალები და ეს მასალები გადახურვის სამუშაოების შესასრულებლად არ გამოუყენებიათ, ხოლო 5.6 ათასი ლარის ღირებულების საქონელი ზედმეტად არის გადაცემული სხვადასხვა საცხოვრებელი სახლის გადასახურად, რომლის რეალური საჭიროება არ არსებობდა;
  • 2014-2015 წლებში „სოფლის მხარდაჭერის პროგრამის“ ფარგლებში შესყიდულია და გამგებლის წარმომადგენლებისთვის გადაცემულია 53.9 ათასი ლარის ღირებულების მასალა, რომელიც დასაწყობებულია და არ მომხდარა მისი გამოყენება მოსახლეობის საჭიროებების დასაკმაყოფილებლად. შესაბამისად, არ სრულდება „სოფლის მხარდაჭერის პროგრამით“ განსაზღვრული მოთხოვნები და მოსახლეობა ვერ სარგებლობს მიწოდებული მატერიალური სიკეთით;
  • 2014-2015 წლებში მუნიციპალიტეტმა სახელმწიფო შესყიდვების კანონმდებლობით განსაზღვრული მონეტარული ზღვრების და/ან შესყიდვების გეგმის დარღვევით განახორციელა 52 სახელმწიფო შესყიდვა, ჯამური სახელშეკრულებო ღირებულებით - 2159.8 ათასი ლარი;
  • 2014 წელს გამგეობამ 2 შემთხვევაში დაგვიანებით აანაზღაურა შესრულებული სამუშაოების ღირებულება. მიმწოდებლებმა მიმართეს სასამართლოს მუნიციპალიტეტისათვის პირგასამტეხლოს დაკისრების მოთხოვნით. შედეგად, გამგეობას შემსრულებლების სასარგებლოდ დაეკისრა 2 ათასი ლარის გადახდა;
  • 2014-2015 წლებში ზესტაფონის მუნიციპალიტეტში შრომის ანაზღაურების სახით გაცემულია 3 869.9 ათასი ლარი, მათ შორის, პრემიის სახით - 627.2 ათასი ლარი, 2015 წელს გაცემულია დანამატიც, 84.6 ათასი ლარის ოდენობით. შტატგარეშე მოსამსახურეებზე ანაზღაურებულია 118.1 ათასი ლარი, მათ შორის, პრემია 23.2 ათასი ლარი. ამავე პერიოდში მუნიციპალიტეტის როგორც შტატით გათვალისწინებულ, ასევე შტატგარეშე თანამშრომლებზე გაცემულია „საშვებულებო დახმარება“ 203.3 ათასი ლარის ოდენობით. აღსანიშნავია, რომ მოქმედი კანონმდებლობა დაქირავებულებისათვის „საშვებულებო დახმარების“ გაცემას არ ითვალისიწინებს;
  • 2014 წელს ზესტაფონის მუნიციპალიტეტმა 3 პირს აუნაზღაურა იძულებითი განაცდური 3 თვის თანამდებობრივი სარგოს ოდენობით, სულ - 6.7 ათასი ლარი. დოკუმენტაციის შესწავლით გამოვლინდა, რომ 2013 წელს გამგებლის მოვალეობის შემსრულებლის ბრძანებებით განთავისუფლებულმა 3-მა პირმა სასამართლოში გაასაჩივრა სამართლებრივი აქტები მათი განთავისუფლების შესახებ. შედეგად, სამივე პირი აღდგენილ იქნა გამგეობის შესაბამის თანამდებობებზე.

მიმაგრებული ფაილები

თვითმმართველი ქალაქი თელავის მუნიციპალიტეტის 2014-2015 წლების საქმიანობის შესაბამისობის აუდიტი

გამოქვეყნების თარიღი: 19:06:2017

დეპარტამენტი: ადგილობრივი თვითმმართველი ერთეულების ბიუჯეტების აუდიტის დეპარტამენტი

ტიპი: შესაბამისობის აუდიტი

სახელმწიფო აუდიტის სამსახურმა ჩაატარა თვითმმართველი ქალაქი თელავის მუნიციპალიტეტის 2014-2015 წლების საქმიანობის შესაბამისობისაუდიტი. აუდიტის შედეგად გამოვლინდა არსებითი ხასიათის დარღვევა-ნაკლოვანებები:

  • 2014-2015 წლებში მუნიციპალიტეტმა ქუჩების საყოფაცხოვრებო ნარჩენების დასუფთავებისა და ნაგავსაყრელზე გატანის სამუშაოების შესასრულებლად, გადაუდებელი აუცილებლობის მოტივით, 5 შემთხვევაში ხელშეკრულება გააფორმა გამარტივებული შესყიდვის გზით. სახელშეკრულებო ღირებულებამ სულ 110.8 ათასი ლარი შეადგინა. აღნიშნული შესყიდვები არ წარმოადგენდა გადაუდებელ აუცილებლობას, რადგან სამუშაოების წინასწარი დაგეგმვა და ელექტრონული ტენდერის გზით შესყიდვა შესაძლებელი იყო;
  • 2015 წელს ქალაქ თელავის მერიამ შეისყიდა ქალაქ თელავში რუსთაველის გამზირისა და ტაბიძის ქუჩის სარეაბილიტაციო სამუშაოები, სახელშეკრულებო ღირებულებით 644.9 ათასი ლარი. მუნიციპალიტეტის წარმომადგენლებთან ერთად აუდიტის ჯგუფმა დაათვალიერა აღნიშნული ობიექტები. გამოვლინდა, რომ ტაბიძის ქუჩის ერთი მონაკვეთი დაზიანებულია. მუნიციპალიტეტის მიერ დაზიანების აღმოსაფხვრელად შესაბამისი ღონისძიება არ გატარებულა;
  • ადგილობრივი თვითმმართველობის კოდექსის თანახმად, მუნიციპალიტეტში შტატგარეშე მოსამსახურეთა რაოდენობა არ უნდა აღემატებოდეს 9 ერთეულს. 2015 წელს გაფორმებული შრომითი ხელშეკრულებების საფუძველზე, მუნიციპალიტეტის წარმომადგენლობით და აღმასრულებელ ორგანოში 9 თვის განმავლობაში დასაქმებულია სხვადასხვა რაოდენობის შტატგარეშე მოსამსახურე, რომელთა რიცხოვნობა მერყეობს 11-დან 26-მდე;
  • 2014-2015 წლებში თვითმმართველი ერთეულის მიერ 39 შემთხვევაში სარესტორნო მომსახურებაზე გაწეულ წარმომადგენლობით ხარჯზე მუნიციპალიტეტმა ვერ წარმოადგინა შესაბამისი დოკუმენტური მტკიცებულებები იმის შესახებ, თუ რა სახის ღონისძიებებთან დაკავშირებით გახდა საჭირო აღნიშნული ხარჯის გაწევა. ასევე, არ არის იდენტიფიცირებული სტუმრების ვინაობა და რაოდენობა. შედეგად, მუნიციპალიტეტის მიერ შესაბამისი დასაბუთების გარეშე ანაზღაურებულია 14.2 ათასი ლარი;
  • საკრებულოს წევრებს, რომლებიც არ არიან თანამდებობის პირები, მერია უნაზღაურებს საკრებულოს კომისიებისა და სამუშაო ჯგუფების სხდომებში მონაწილეობისათვის, ასევე საკრებულოსა და საკრებულოს თავმჯდომარის დავალებების შესრულებისათვის ყოველთვიურად გაწეულ ხარჯებს. მერიის მიერ აღნიშნული ხარჯის ანაზღაურება უნდა განხორციელდეს ფაქტობრივად გაწეული ხარჯის დამადასტურებელი დოკუმენტების საფუძველზე. 2014-2015 წლებში უფლებამოსილების განსახორციელებლად საკრებულოს არათანამდებობის პირებზე გაიცა 22.2 ათასი ლარი. საკრებულოს დეპუტატებზე ხარჯები ანაზღაურებულია ისე, რომ არცერთ შემთხვევაში მათ არ წარმოუდგენიათ ხარჯის გაწევის დამადასტურებელი დოკუმენტები;
  • 2014-2015 წლებში მუნიციპალიტეტი სამსახურებრივი უფლებამოსილების განსახორციელებლად სარგებლობდა როგორც ბალანსზე რიცხული 6 ერთეული ავტომანქანით, ასევე, სხვადასხვა თანამდებობის პირებისა და თანამშრომლების პირად საკუთრებაში არსებული 15-ზე მეტი სატრანსპორტო საშუალებით. მუნიციპალიტეტის მიერ სამსახურებრივი უფლებამოსილების განსახორციელებლად გამოყენებული სატრანსპორტო საშუალებების რაოდენობა აღემატება მთავრობის დადგენილებით რეკომენდებულ ზღვრულ ოდენობას;
  • 2014-2015 წლებში მუნიციპალიტეტში ფუნქციონირებდა ა(ა)იპ „სასპორტო გაერთიანება“. 2015 წელს აღნიშნულ ა(ა)იპ-ს გამოეყო რამდენიმე სპორტული სახეობის წრე, რომელთა საფუძველზეც დაფუძნდა 2 ახალი ა(ა)იპ. 2015 წელს წინა წელთან შედარებით, იურიდიული პირების მატების გამო, 128.8 ათასი ლარით გაზრდილი სუბსიდიური დაფინანსებიდან, მხოლოდ 44.9 ათასი ლარის ხარჯი გამომდინარეობდა ობიექტური საჭიროებიდან, ხოლო 83.9 ათასი ლარის ადმინისტრაციული ხარჯი, შეიძლება მივიჩნიოთ არარაციონალურად.

მიმაგრებული ფაილები

თვითმმართველი თემი თელავის მუნიციპალიტეტის 2014-2015 წლების საქმიანობის შესაბამისობის აუდიტი

გამოქვეყნების თარიღი: 16:06:2017

დეპარტამენტი: ადგილობრივი თვითმმართველი ერთეულების ბიუჯეტების აუდიტის დეპარტამენტი

ტიპი: შესაბამისობის აუდიტი

სახელმწიფო აუდიტის სამსახურმა ჩაატარა თვითმმართველი თემი თელავის მუნიციპალიტეტის 2014-2015 წლების საქმიანობის შესაბამისობის აუდიტი. აუდიტის შედეგად გამოვლინდა არსებითი ხასიათის სხვადასხვა დარღვევა-ნაკლოვანება:

  • 2015 წელს თვითმმართველ თემში იურიდიული პირების მიერ გადაუხდელმა დასუფთავების მოსაკრებელმა 76.2 ათასი ლარი შეადგინა. მუნიციპალიტეტს ბიუჯეტით გათვალისწინებული დასუფთავების მოსაკრებლის მისაღებად კანონით გათვალისწინებული ღონისძიებები არ გაუტარებია;
  • მუნიციპალიტეტის საკუთრებაში არსებული ქონებით უსასყიდლოდ სარგებლობდნენ არაუფლებამოსილი პირები. კერძოდ: 2014-2015 წლებში 9649 კვ.მ არასასოფლო-სამეურნეო დანიშნულების მიწას იყენებდნენ კერძო კომპანიები, ხოლო 11614.3 ჰა სასოფლო-სამეურნეო დანიშნულების მიწას (მათ შორის, 11 598 ჰა საძოვარი) - ფიზიკური პირები. მუნიციპალიტეტი სასოფლო-სამეურნეო დანიშნულების მიწების იჯარით გაცემის შემთხვევაში, წლიურად მიიღებდა 170 ათას ლარზე მეტ შემოსავალს;
  • 2014 წელს მუნიციპალიტეტმა გააფორმა საგზაო სამუშაოების შესყიდვის ხელშეკრულება მიმწოდებელთან 1118.3 ათას ლარზე. შემსყიდველმა უამინდობის მოტივით გააგრძელა სამუშაოების დასრულების ვადა, მაშინ როდესაც დოკუმენტური მტკიცებულებებით არ დასტურდება, რომ რაიმე ფორსმაჟორულ სიტუაციას ადგილი ჰქონდა. იმ შემთხვევაში, თუ გამგეობა შემსრულებელს სამუშაოების დასრულების ვადას არ გაუგრძელებდა და აამოქმედებდა ხელშეკრულებით გათვალისწინებულ საჯარიმო სანქციებს, მიმწოდებელს დაეკისრებოდა პირგასამტეხლო 64.9 ათასი ლარის ოდენობით;
  • 2014-2015 წლებში მუნიციპალიტეტმა 2 შემთხვევაში - მდინარის ნაპირსამაგრი სამუშაოებისა და საბავშვო ბაღის მშენებლობაზე შეწყვიტა შესყიდვის ხელშეკრულებები მიმწოდებლებთან, რადგან ისინი არ ასრულებდნენ ხელშეკრულებით ნაკისრ ვალდებულებებს. სამუშაოების შესრულების ვადების დარღვევისათვის დარიცხული პირგასამტეხლო, ჯამში 43.3 ათასი ლარი, მიმწოდებლებმა არ გადაიხადა. აღნიშნული თანხის მისაღებად მუნიციპალიტეტს დამატებითი ღონისძიება არ გაუტარებია;
  • სახელმწიფო შესყიდვების კანონის თანახმად, გამარტივებული შესყიდვის გზით მიმწოდებლის შერჩევისას აუცილებელია ინტერესთა კონფლიქტის თავიდან აცილება. 2014-2015 წლებში მუნიციპალიტეტის მიერ შპს „ბილდინგთან“ გამარტივებული შესყიდვით გაფორმდა 30 ხელშეკრულება, ჯამური ღირებულებით 447.9 ათასი ლარი. აღნიშნული მეწარმე სუბიექტის დირექტორი და მფლობელი მუნიციპალიტეტის გამგებლის მოადგილის ახლო ნათესავები არიან;
  • სამშენებლო სამუშაოების გამარტივებული გზით შესყიდვისას, მიმწოდებლის მიერ შესრულებული სამუშაოების ღირებულება უნდა ანაზღაურდეს ფაქტობრივი დანახარჯების მიხედვით. 2014-2015 წლებში მუნიციპალიტეტს არ მოუთხოვია მიმწოდებლებისგან ფაქტობრივი დანახარჯების შესახებ დოკუმენტაცია. შესაბამისად, სააუდიტო პერიოდში გამარტივებული შესყიდვის ფარგლებში, მუნიციპალიტეტის მიერ 3 622.7 ათასი ლარის ღირებულების სამშენებლო სამუშაოები ანაზღაურებულია კანონმდებლობის დარღვევით;
  • 2014-2015 წლებში მუნიციპალიტეტის მიერ „სოფლის მხარდაჭერის პროგრამის“ ფარგლებში; 57.1 ათასი ლარი დახარჯულია ისეთ პროექტებზე, რომლებიც არ ფუნქციონირებს. კერძოდ: მინისტადიონის ხელოვნური საფარი დასაწყობებულია ადმინისტრაციული შენობის ეზოში, ასევე შესყიდული ექსკავატორები და თვითმცლელი არ მუშაობს;
  • 2015 წელს თვითმმართველი თემი თელავის მუნიციპალიტეტმა სოფელ აკურაში ჭაბურღილის მოწყობაზე დახარჯა 64.2 ათასი ლარი. ჭაბურღილმა იმუშავა ექსპლუატაციაში შესვლიდან მხოლოდ რამდენიმე დღე. აუდიტის მიმდინარეობის პერიოდში პრობლემა მოუგვარებელი იყო და მოსახლეობა ვერ სარგებლობდა აღნიშნული ობიექტით;
  • ადგილობრივი თვითმმართველობის კოდექსის თანახმად, თვითმმართველი თემი თელავის მუნიციპალიტეტში შტატგარეშე მოსამსახურეთა რაოდენობა არ უნდა აღემატებოდეს 18 ერთეულს. 2015 წელს გაფორმებული შრომითი ხელშეკრულებების საფუძველზე, მუნიციპალიტეტის წარმომადგენლობით და აღმასრულებელ ორგანოში თვეების მიხედვით დასაქმებულია სხვადასხვა რაოდენობის შტატგარეშე მოსამსახურე, რომელთა რიცხოვნობა მერყეობს 28-დან 30-მდე;
  • 2014-2015 წლებში თვითმმართველი ერთეულის მიერ 46 შემთხვევაში სარესტორნო მომსახურებაზე გაწეულ წარმომადგენლობით ხარჯზე, მუნიციპალიტეტმა ვერ წარმოადგინა შესაბამისი დოკუმენტური მტკიცებულებები იმისა, თუ რა სახის ღონისძიებებთან დაკავშირებით გახდა საჭირო აღნიშნული ხარჯის გაწევა. ასევე, არ არის იდენტიფიცირებული სტუმრების ვინაობა და რაოდენობა. შედეგად, მუნიციპალიტეტის მიერ შესაბამისი დასაბუთების გარეშე ანაზღაურებულია 18.9 ათასი ლარი;
  • 2014-2015 წლებში მუნიციპალიტეტი სამსახურებრივი უფლებამოსილების განსახორციელებლად სარგებლობდა როგორც ბალანსზე რიცხული 7 ერთეული ავტომანქანით, ასევე სხვადასხვა თანამდებობის პირებისა და თანამშრომლების პირად საკუთრებაში არსებული 42 ერთეული სატრანსპორტო საშუალებით. მუნიციპალიტეტის მიერ სამსახურებრივი უფლებამოსილების განსახორციელებლად გამოყენებული სატრანსპორტო საშუალებების რაოდენობა აღემატება საქართველოს მთავრობის დადგენილებით რეკომენდირებულ ზღვრულ ოდენობას.

მიმაგრებული ფაილები

ქალაქ თბილისის მუნიციპალიტეტის ისნის რაიონის გამგეობის 2015-2016 წლების საფინანსო-ეკონომიკური საქმიანობის შესაბამისობის აუდიტი

გამოქვეყნების თარიღი: 16:06:2017

დეპარტამენტი: ადგილობრივი თვითმმართველი ერთეულების ბიუჯეტების აუდიტის დეპარტამენტი

ტიპი: შესაბამისობის აუდიტი

სახელმწიფო აუდიტის სამსახურმა ჩაატარა ქალაქ თბილისის მუნიციპალიტეტის ისნის რაიონის გამგეობის 2015-2016 წლების საფინანსო-ეკონომიკური საქმიანობის შესაბამისობის აუდიტი. აუდიტის შედეგად გამოვლინდა შემდეგი დარღვევა-ნაკლოვანებები:

  • 2015-2016 წლებში კეთილმოწყობის ღონისძიებების ქვეპროგრამების ფარგლებში, ისნის რაიონის გამგეობამ რეაბილიტაცია ჩაუტარა და მოაწყო 52 სპორტული მოედანი და სკვერი, ღირებულებით 2183.8 ათასი ლარი. სახელშეკრულებო პირობების თანახმად, შესრულებული სამუშაოების საგარანტიო ვადა შეადგენდა 2 წელს. დათვალიერების შედეგად 2015 წელს ექსპლოატაციაში მიღებულ 7 ობიექტზე გამოვლინდა სხვადასხვა ხარვეზები. დაზიანებულია: მოედნის ხელოვნური საფარი, ატრაქციონები, ღობე, კალათბურთის ფარები, დაკარგულია ინვენტარი, არ მუშაობს წყლის სასმელი ორი ფანტანი. გამოვლენილი გარემოების გამომწვევი მიზეზი შესაძლოა იყოს მიმწოდებლის მიერ შესრულებული სამუშაოს დაბალი ხარისხი ან/და მოსახლეობის მიერ არასწორი ექსპლუატაცია (ვანდალიზმი).

შესწავლილი მონაცემებით ირკვევა, რომ სპორტულ მოედნებსა და სკვერებში გამოვლენილ დაზიანებებზე, მიმწოდებლებისთვის არ არის მოთხოვნილი საგარანტიო ვადაში მომხდარი დაზიანებების გამოსწორება და არც სამართლებრივი ღონისძიებებია გატარებული. ისნის რაიონის გამგეობაში არსებული კონტროლის მექანიზმები არასაკმარისია და ვერ უზრუნველყოფს არსებული ხარვეზების გამოვლენასა და გამოსწორებას. შედეგად, გამგეობის მიერ 4 სკვერისა და 3 სპორტული მოედნის მოწყობის სამუშაოებით სრულად ვერ იქნა მიღწეული პროგრამით გათვალისწინებული მიზნები ექსპლუატაციის მთელ პერიოდში;

  • 2015-2016 წლებში ისნის რაიონის გამგეობაში გამგებელზე, მის მოადგილეებზე, განყოფილებების უფროსებსა და აპარატის უფროსზე ყოველთვიურად გაცემულია სახელფასო დანამატი, სულ 278.4 ათასი ლარი. დანამატის გაცემის საფუძველს წარმოადგენსქ. თბილისის მუნიციპალიტეტის მერის მიერ გამოცემული ინდივიდუალურ-ადმინისტრაციული სამართლებრივი აქტი - ბრძანებები. აღნიშნული ბრძანებები ადგენს დანამატის გაცემის დროებით და მრავალჯერადი გამოყენების წესს და თავისი შინაარსით წარმოადგენს ნორმატიულ ადმინისტრაციულ სამართლებრივ აქტს. კანონმდებლობით დაუშვებელია ნორმატიული შინაარსის სამართლებრივი აქტის ინდივიდუალური აქტის სახით მიღება. აღნიშნულიდან გამომდინარე, ქ. თბილისის მუნიციპალიტეტის მერმა გამოსცა ნორმატიული შინაარსის სამართლებრივი აქტი, რომლის გამოცემის უფლება არ გააჩნდა. ადგილობრივი თვითმმართველობის კოდექსის შესაბამისად, ნორმატიულ ადმინისტრაციულ-სამართლებრივი აქტის გამოცემის უფლებამოსილება გააჩნია მხოლოდ მუნიციპალიტეტის საკრებულოს. ამდენად, სამართლებრივი აქტი, რომლის საფუძველზეც 2015-2016 წლებში გაიცა დანამატი, თავისი შინაარსით არ შეესაბამება კანონმდებლობით გათვალისწინებულ მოთხოვნებს.
  • 2015-2016 წლებში ისნის რაიონის გამგეობას სამსახურებრივი მოვალეობის შესასრულებლად ემსახურებოდა 9 ავტოსატრანსპორტო საშუალება. ადგილობრივი თვითმმართველობებისათვის ავტოსატრანსპორტო საშუალებების ზღვრული ოდენობა კანონმდებლობით არ არის დარეგულირებული. საქართველოს მთავრობის დადგენილებით განსაზღვრულია სამსახურებრივი მიმოსვლისათვის საჭირო ავტოსატრანსპორტო საშუალებების მაქსიმალური ოდენობა. თვითმმართველობისათვის აღნიშნული წესის დაცვა სავალდებულო არ არის და მხოლოდ სარეკომენდაციო ხასიათისაა. მთავრობის დადგენილებით რეკომენდებული იყო, ისნის რაიონის გამგეობის თანამშრომლების სამსახურებრივი მიმოსვლისათვის გამოეყენებინა 3 ერთეული სამორიგეო ავტომობილი.
  • 2015-2016 წლებში სოციალური პროგრამის ღონისძიებების ფარგლებში ისნის რაიონის გამგეობის მიერ გაცემული თანხის 34.5%-ით, 2596.1 ათასი ლარით დაფინანსებულია „სხვა სოციალური (დახმარების) ღონისძიებების“ ქვეპროგრამა. ქვეპროგრამის მიზანი ზოგადი ხასიათისაა. არ არის განსაზღვრული დახმარების გაცემის კრიტერიუმები, რომლებიც უნდა დააკმაყოფილოს ბენეფიციარმა. არ არის დადგენილი ვის უნდა მიენიჭოს პრიორიტეტი გადაწყვეტილების მიღების პროცესში. არსებული პრაქტიკა მოქალაქეთა სოციალური მდგომარეობის შეფასებისას, შეიცავს სუბიექტური გადაწყვეტილებების მიღების რისკებს.

მიმაგრებული ფაილები